दुसऱ्या प्रवेश फेरीचा आज अंतिम दिवस

सायंकाळी पाचपर्यंत अर्ज भरण्याचे आवाहन

म. टा. प्रतिनिधी, पुणे

अकरावी ऑनलाइन प्रवेश प्रक्रियेत दुसऱ्या फेरीला शनिवारी सुरुवात झाली. दुसऱ्या फेरीत सोमवारपर्यत ऑनलाइन अर्जातील पहिला भाग ८८५ विद्यार्थ्यांनी, दुसरा भाग एक हजार ७७ विद्यार्थ्यांनी भरला. अद्याप प्रवेश प्रक्रियेत सहभागी न झालेल्या तसेच अर्जातील केवळ भाग एक भरलेल्या विद्यार्थ्यांनाही प्रक्रियेत सहभागी होता येईल. अशा विद्यार्थ्यांना ऑनलाइन अर्जाचे दोन्ही भाग आज, मंगळवारी शेवटच्या दिवशी सायंकाळी पाच वाजेपर्यंत भरून फेरीत सहभागी होता येईल, अशी माहिती अकरावी प्रवेश नियंत्रण समितीतर्फे देण्यात आली.
केंद्रीय प्रवेश समितीमार्फत केंद्रीय पद्धतीने अकरावी प्रवेशाची ऑनलाईन प्रक्रिया राबविली जात आहे. या प्रक्रियेतील पहिली प्रवेश फेरी शुक्रवारी पूर्ण झाली. या फेरीत ४८ हजार ३१५ विद्यार्थ्यांची प्रवेशासाठी निवड करण्यात आली होती. त्यापैकी २४ हजार ६७२ विद्यार्थ्यांनी प्रवेश घेतला आहे. दुसऱ्या फेरीसाठी अर्ज केलेल्या ८८५ विद्यार्थ्यांनी अर्जाचा पहिला भाग तर एक हजार ७७ विद्यार्थ्यांनी अर्जाचा दूसरा भाग भरून पूर्ण केला आहे. पहिल्या फेरीतील ३ हजार ४४२ विद्यार्थ्यांचा अर्जाचा पहिला भाग व ३२४ विद्यार्थ्यांचा दूसरा भाग अपूर्ण आहे. अशा विद्यार्थ्यांनी जवळच्या मार्गदर्शन केंद्रावर जाऊन कागदपत्रे अथवा माहितीअभावी अपूर्ण राहिलेले अर्ज पूर्ण करून घेणे गरजेचे आहे. या फेरीत विद्यार्थ्यांना कॉलेजांचे पसंतीक्रम बदलता येतील. पहिल्या फेरीत ज्या विद्यार्थ्यांना कॉलेज मिळाले नाही तसेच पसंतीक्रमातील दोन ते दहा क्रमांकावरील कॉलेज प्रवेशासाठी मिळाले होते, मात्र कॉलेजात प्रवेश घेतला नाही, अशांना पसंतीक्रमात बदल करता येणार आहे.
पसंतीक्रमात बदल न केल्यास पहिल्या फेरीतील कॉलेजांचे पसंतीक्रम दुसऱ्या फेरीसाठी लागू होणार आहेत. विद्यार्थ्यांनी अधिक माहितीसाठी pune.11thadmission.net या वेबसाइटचा वापर करावा, असे समितीतर्फे सांगण्यात आले.

असा भरा अर्ज...
अकरावी प्रवेश प्रक्रियेत सहभागी न झालेल्या विद्यार्थ्यांनी माहिती पुस्तिकेतील अॅप्लिकेशन आयडी आणि पासवर्डचा वापर करून pune.11thadmission.net या वेबसाइटवर आजा मंगळवारी १८ जुलैपर्यत सायंकाळी पाच वाजेपर्यत भाग एक आणि दोन भरावा. ही विद्यार्थ्यांसाठी शेवटची संधी आहे. पसंतीक्रम बदलण्यासाठी ‘माय प्रोफाइल’ विकल्पात जाऊन आवडत्या कॉलेजांची नावे भरावीत. ही प्रक्रिया करताना विद्यार्थ्यांनी ‘प्रिंट फॉर्म’ विकल्पावर क्लिक करू नये. क्लिक झाल्यास पहिल्या फेरीतील पसंतीक्रमच पुन्हा ग्राह्य धरण्यात येईल. तसेच, पसंतीक्रमात नंतर बदल करता येणार नाही. पसंतीक्रम भरून झाल्यानंतर ‘सेव्ह’ आणि त्यानंतर ‘ओके’ विकल्पावर क्लिक करण्यात येईल. त्यानंतर नव्या पसंतीक्रमाची प्रिंट काढता येईल, असे समितीने सांगितले.