प्रत्येक ब्राह्मण नथुराम गोडसे नसतो: सबनीस

मटा ऑनलाइन वृत्त। पुणे

'सर्व जातींचा जातीयवाद भयंकर आहे. ब्राह्मणेतरांचा जातीयवाद ब्राह्मणांना लाजवेल असा आहे. प्रत्येक ब्राह्मण नथुराम गोडसे नसतो', अशा शब्दांत साहित्य संमेलनाचे माजी अध्यक्ष डॉ. श्रीपाल सबनीस यांनी 'पुतळे आणि जातीयवाद' मुद्द्यावर सूचक भाष्य करत माजी संमेलनाध्यक्ष डॉ. सदानंद मोरे यांना टोला लगावला आहे. गेले अनेक दिवसांपासून राज्यात चर्चेत असलेल्या नाटककार राम गणेश गडकरी पुतळ्याच्या मुद्द्यावर माजी संमेलनाध्यक्ष डॉ. सदानंद मोरे यांनी गडकरी यांच्याऐवजी छत्रपती संभाजी महाराजांवर होणारे सर्व आरोप खोडून काढणारे ज्येष्ठ इतिहास संशोधक वासुदेव बेंद्रे यांचा पुतळा बसवावा अशी सूचना केली होती. त्या सूचनेचा धागा पकडून डॉ. सबनीस यांनी 'पुतळे आणि जातीयवाद' या विषयावर भाष्य केले आहे.

रंगत-संगत प्रतिष्ठानला पंचवीस वर्षे पूर्ण झाल्याच्या निमित्ताने पुण्यात महाराष्ट्र साहित्य कला प्रसारिणी सभेतर्फे आयोजित कार्यक्रमात ते बोलत होते. या कार्यक्रमात डॉ. सबनीस यांच्या हस्ते रंगत-संगत प्रतिष्ठानचे संस्थापक अध्यक्ष अॅड. प्रमोद आडकर यांचा सत्कार करण्यात आला.

या विषयावर बोलताना सबनीस पुढे म्हणाले की, कलेला जात, धर्म नसतो. लेखकांच्या पुतळ्यांपेक्षा त्यांची कलाकृती श्रेष्ठ असते. बेंद्रेंचाही पुतळा फो़डायला कमी करणार नाहीत. महापुरूषही सामान्य माणूस असतो. प्रतिभावंतांवर विवेकाची, साधने तपासण्याची गरज आहे. लेखकाच्या मर्यादा सांगताना पुतळे फोडणे हा लोकशाही मार्ग नाही. लेखकांच्या पुतळ्यांमध्ये जातीयवादाचा वास नको.

उद्याने ही झाडांची असतात, ती पुतळ्यांची नकोत असे म्हणत सबनीस यांनी समाज समंजस होत नाही तो पर्यंत पुतळा संस्कृती उपयोगाची नसल्याचे म्हटले आहे. कुणाचेही भक्त कुणाचाही पुतळा उभा करतील. उद्या सदानंद मोरे किंवा माझाही पुतळा उभा करतील. हे परवडणारे नाही. सर्व जातींचा जातीयवाद भयंकर आहे. ब्राह्मणेतरांचा जातीयवाद ब्राह्मणांना लाजवेल असा आहे. प्रत्येक ब्राह्मण काही नथुराम गोडसे नव्हे अशा शब्दांत श्रीपाल सबनीस यांनी जातीयवादावर बोट ठेवले आहे.

या कार्यक्रमात उपस्थित असलेले वात्रटिकाकार रामदास फुटाणे यांनीही डॉ. सदानंद मोरे यांच्या वक्तव्यावर टीकास्त्र सोडले. फुटाणे म्हणाले की, सदाआनंद देणारी माणसे कमी भेटतात. बागेतल्या पुतळ्यांना आता आपोआप पाय फुटतील. बागेत सदाआनंद देणाऱ्या सदाआनंदाचा पुतळा बसवावा. त्यामुळे भांडणे आपोआप मिटतील, अशा शब्दांत ज्येष्ठ वात्रटिकाकार रामदास फुटाणे यांनी संत साहित्याचे ज्येष्ठ अभ्यासक डॉ. सदानंद मोरे यांच्यावर टीका केली.