‘करोना’विषयी दररोज दीडशे प्रश्न

पिंपरी : 'मला सर्दी खोकल्याचा त्रास आहे', 'आमच्या सोसायटीत बाहेरून एक व्यक्ती आली आहे,' 'करोनाची लक्षणे काय आहेत? कशी काळजी घ्यावी', याबाबत सरकारच्या नक्की सूचना कोणत्या' अशा अनेक प्रश्नांची विचारणा 'पीसीएमसी स्मार्ट सारथी' मोबाइल अॅपवर करण्यात येत आहे. दररोज दीडशेहून अधिक नागरिक पालिकेकडून 'अपडेट' घेत आहेत. त्यामुळे करोनाविषयीच्या शंकांचे निरसन करण्यासाठी 'पीसीएमसी सारथी अॅप' महत्त्वाचा दुवा ठरत असल्याचे स्पष्ट झाले आहे.

नागरिकांच्या 'करोना'विषयीच्या शंकांचे निरसन व्हावे, तसेच सरकारच्या सूचना, जिल्हाधिकाऱ्यांचे आदेश याची सविस्तर माहिती 'पीसीएमसी स्मार्ट सारथी' मोबाइल अॅपवर शहरवासीयांना देण्यात येत आहेत. हे अॅप 'गुगल प्ले'वरून डाउनलोड करता येते. त्यावर चेकलिस्ट उपलब्ध असून लक्षणांबाबत एकूण १३ प्रश्न आहेत, पालिकेचे वैद्यकीय अधिकारी व्यक्तीश: मार्गदर्शन करीत आहेत. आयुक्त श्रावण हर्डीकर म्हणाले, 'हे अॅप गुगल प्ले स्टोअरवरून अँड्रॉइड मोबाइलवर डाउनलोड करण्याची सुविधा आहे. त्याचप्रमाणे अॅपल युजरकरिता अॅप स्टोअरवर उपलब्ध आहे. 'PCMC Smart Sarathi' या नावाने सर्च करून अॅप डाउनलोड करावे. त्यानंतर नोंदणी केल्यावर अॅपचा वापर करता येईल.'