म. टा. प्रतिनिधी, पुणे
गुलाबी थंडीमुळे वातावरणात पसरलेल्या गारव्यामध्ये झालेले बहारदार गायन आणि व्हायोलिनवर छेडलेल्या सुरावटींनी मैफलीत सुरेल रंग भरले अन् रसिकांना जणू संगीत विश्वाची अनोखी सफर घडली. कलाकारांनी पेश केलेल्या अभिजात संगीताच्या सादरीकरणाला रसिकांची दाद मिळाल्याने मैफल उत्तरोत्तर रंगत गेली.
मित्र फाउंडेशनच्या वतीने आयोजित 'मित्र महोत्सवा'ला रसिकांची उत्स्फूर्त प्रतिसाद मिळाला. महोत्सवाची सुरुवात किराणा घराण्याचे सुप्रसिद्ध गायक आनंद भाटे यांच्या गायनाने झाली. त्यांनी राग पुरिया धनश्रीने मैफलीस सुरुवात केली. भाटे यांनी गायलेल्या 'सुमिरो तेरो नाम', 'पायलिया झनकार मोरी' या रचनांना रसिकांची दाद मिळाली. त्यानंतर त्यांनी 'मिश्र काफी'मधील टप्पा आणि तराणा सादर केला. पं. भीमसेन जोशी यांनी अजरामर केलेला 'तीर्थ विठ्ठल क्षेत्र विठ्ठल' या अभंगाच्या सादरीकरणाने मैफलीत भक्तिरंग भरले. त्यांना सुयोग कुंडलकर यांनी संवादिनीवर, तर भरत कामत यांनी तबल्यावर साथसंगत केली.
महोत्सवामध्ये ज्येष्ठ व्हायोलिनवादक एन. राजम यांच्या हस्ते प्रसिद्ध शास्त्रीय गायिका कुसुम सोहनी यांना गौरवनिधी प्रदान करण्यात आला. या वेळी मित्र फाउंडेशनचे धनंजय गोखले उपस्थित होते. सोहनी म्हणाल्या, 'मी लहानपणापासून गाणे गात होते. त्यामुळे माझ्यात सभाधीटपणा होता. संगीताचे शिक्षण मी २७ व्या वर्षी सुरू केले आणि संगीत विशारद झाले. मास्टर कृष्णराव फुलंब्रीकर यांनी माझी परीक्षा घेतली होती. त्यानंतर १९७० पासून संगीत शिक्षिका म्हणून काम करत आहे.' महोत्सवाच्या पहिल्या सत्राचा समारोप एन. राजम यांच्या व्हायोलिन वादनाने झाला.