करीता शब्द कामातून हद्दपार

हिंगोली- प्रशासकीय कामकाजात अधिकारी व कर्मचारी अनेकदा पद व नाम याचा उल्लेख न करता करिताचा शेरा मारून कार्यालयीन कागदपत्रांचा व्यवहार पार पाडत होते. परंतु राज़य सरकारच्या परिपत्रकानुसार यापुढे करिता हा शब्द कामकाजातून बाद करण्यात आला असून यासंदर्भात शासननिर्णयानुसार परिपत्रक जारी करण्यात आले असून सदर शब्द वापरणाऱ्या अधिकारी व कर्मचाऱ्यावर कारवाई करण्यात येणार आहे.

कोकण माहिती आयुक्तांच्या खंडपीठासमोर सुरू असलेल्या अपीलाच्या सुनावणीत फेरफारसंदर्भात करिता शब्दामुळे अधिकाऱ्याचे नाव व पद नमुद नसल्यामुळे जबाबदारी निश्‍चित करण्याबाबत अडचण निर्माण झाली होती. त्यामुळे राज्य सरकारने या प्रकरणावरून परिपत्रक जारी करत करिता हा शब्द शासकीय कामकाजातून बाद केला आहे. त्यामुळे आता सर्व विभाग व कार्यालयातील सर्व पत्रव्यवहार, कागदपत्रे, आदेश व पावती व इतर कोणत्याही दस्तावेजावर सही करणाऱ्या अधिकारी, कर्मचारी यांना सही खाली स्वत:चे नाव, पदनाम नमूद करणे बंधनकारक असणार आहे. करिता असा उल्लेख करून निर्गमीत करण्यात येणार पत्रव्यवहार ग्रहीत धरल्या जाणार नाहीत शिवाय असे करणाऱ्या अधिकारी, कर्मचारी यांच्यावर कार्यवाही करण्यात येणार आहे.