२१ फेब्रुवारी
शुक्रवार
'सिटी टेल्स'तर्फे प्रदर्शन
'सिटी टेल्स' या समूहातर्फे चित्रांचे व छायाचित्रांचे प्रदर्शन आयोजित करण्यात आले आहे. दर्पणा आठल्ये, हर्षद आरोळे, गौरी दामले, विद्युत कुलकर्णी यांनी रेखाटलेली चित्रे पाहता येतील. हे प्रदर्शन २३ फेब्रुवारीपर्यंत पाहता येईल.
आर्ट टू डे कलादालन, भांडारकर रस्ता : स. ११ ते सायं. ७
चित्र-छायाचित्रांचे प्रदर्शन
अक्षरनंदन शाळेत नववीत शिकणाऱ्या सार्थवाह व समवार या मित्रांनी बर्फाच्छादित निसर्गचित्रे, समुद्रातील विविध नौकांची चित्रे रेखाटली आहेत. या चित्रांचे; तसेच छायाचित्रांचे प्रदर्शन रसिकांना २५ फेब्रुवारीपर्यंत पाहता येईल.
दर्पण कलादालन, पत्रकार नगर, सेनापती बापट रस्ता : स. ११ ते सायं. ७
संगीत मैफलीचे आयोजन
संगीताचार्य द. वि. काणेबुवा जन्मशताब्दी वर्षाला सुरुवात होत आहे. त्यानिमित्त संगीत मैफल आयोजित करण्यात आली आहे. या मैफलीत पं. रत्नाकर गोखले यांचे व्हायोलिन वादन व पं. शरद जांभेकर यांचे गायन ऐकता येणार आहे. पुष्कर महाजन, आदित्य देशमुख व नीलय साळवी साथसंगत करणार आहेत.
बेडेकर गणपती मंदिर, पौड रस्ता, कोथरूड : सायं. ६
'शिवार्पणम्'चे नृत्यमैफल
महाशिवरात्रीनिमित्त शिवांजली डान्स अॅकॅडमीतर्फे 'शिवार्पणम्' ही नृत्य मैफल आयोजित करण्यात आली आहे. अनुजा बाठे, स्नेहल मुखर्जी, तनुश्री कुरुडकर, पुष्कला शास्त्री, शुभवी जोशी, अनुष्का भंडारी, श्रावी कऱ्हाडकर, अनुष्का भगत या कलाकार भरतनाट्यम् नृत्य शैलीतील रचना सादर करणार आहेत.
पं. जवाहरलाल नेहरू सांस्कृतिक सभागृह, घोले रस्ता : सायं. ६
सजणार गायन, नृत्य मैफल
सर्वोत्कर्ष ट्रस्ट आणि स्वरसंपदा म्युझिक अॅकॅडमी यांच्या वतीने 'मिलाप : दि म्युझिकल कोलाज' या कार्यक्रमाचे आयोजन करण्यात आले आहे. कार्यक्रमात राजेश दातार आणि संपदा वाळवेकर यांचे गायन होणार आहे. शिल्पा दातार यांचे कथक नृत्य सादर होणार आहे. अमित जोशी, माधव लिमये, अनय गाडगीळ, सुनील अवचट, उद्धव कुंभार व आदिती कुलकर्णी या कलाकारांचा सहभाग असेल.
अण्णा भाऊ साठे स्मारक सभागृह, सातारा रस्ता : सायं. ६
२२ फेब्रुवारी
शनिवार
अंकलीकर, अत्रे यांचे गायन
स्वरभास्कर भारतरत्न पं. भीमसेन जोशी यांच्या जयंतीनिमित्त कलाश्री संगीत मंडळ आणि कन्नड संघ यांच्या वतीने 'अभिवादन' या सांगीतिक कार्यक्रमाचे आयोजन करण्यात येत आहे. कार्यक्रमाचे वैशिष्ट्य म्हणजे रसिकांना सकाळच्या रागांबरोबरच रात्रीच्या रागांचाही आस्वाद घेता येणार आहे. शाश्वती चव्हाण व विराज जोशी यांचे गायन होईल. त्यानंतर प्रसिद्ध गायिका आरती अंकलीकर-टिकेकर यांचे गायन होईल. शुजात खान यांचे सतार वादन आणि स्वरयोगिनी डॉ. प्रभा अत्रे यांचे गायन रसिकांना ऐकता येईल.
शकुंतला शेट्टी सभागृह, कर्नाटक हायस्कूल, एरंडवणे : सायं. ५
'मन्सूर संस्मरण' मैफल
न्यू एज फाउंडेशनतर्फे पं. मल्लिकार्जुन मन्सूर यांच्या स्मृतिप्रीत्यर्थ 'मन्सूर संस्मरण' हा शास्त्रीय संगीताचा कार्यक्रम आयोजित करण्यात आला आहे. या संगीतसंध्येत कोलकाता येथील शुभ्रनील सरकार यांचे सतार वादन, प्रियदर्शिनी कुलकर्णी यांचे गायन व दिल्ली येथील पं. बिस्वजित राय चौधरी यांचे सरोदवादन होणार आहे. रामदास पळसुले, हनुमंत फडतरे व हरिप्रिया पाटील साथसंगत करणार आहेत.
एस. एम. जोशी सभागृह, नवी पेठ : सायं. ६
तबलावादन व गायन
पं. लालजी गोखले यांच्या स्मृतिनिमित्त शिष्य परिवारातर्फे संगीत मैफलीचे आयोजन करण्यात आले आहे. दिल्ली घराण्याचे प्रख्यात तबला वादक पं. उमेश मोघे यांचे स्वतंत्र तबला वादन व प्रसिद्ध गायिका सावनी शेंडे-साठ्ये यांचे गायन होणार आहे.
छत्रे सभागृह, मधुकुंज २, एरंडवणे : सायं. ६
'निजखूण', '...भिजकी वही'चे अभिवाचन
'अनन्वय'तर्फे होणाऱ्या 'निजखूण' या कार्यक्रमाची संकल्पना आणि दिग्दर्शन डॉ. माधवी वैद्य यांचे असून, संहिता लेखन मुग्धा गोडबोले-रानडे यांनी केले आहे. लेखिका- अभिनेत्री मुग्धा गोडबोले आणि प्रसिद्ध अभिनेत्री चिन्मयी सुमीत अभिवाचन करणार आहेत. स्वानंदी केळकर, अमृता कोलटकर, मीनल फडके-पोंक्षे काव्यगायन करणार आहेत. कार्यक्रमाचे संगीत संयोजन राहुल घोरपडे यांचे आहे. रविवारी, २३ फेब्रुवारीला अरुण कोलटकरांच्या कवितांवर आधारित 'जेजुरी आणि भिजकी वही' हा कार्यक्रम होणार आहे.
ज्योत्स्ना भोळे सभागृह, टिळक रस्ता : सायं. ६.३०
'भैरव भवतारक' नृत्यप्रस्तुती
ऋत्विक फाउंडेशन व ऋजुता सोमण कल्चरल अॅकॅडमीच्या वतीने महाशिवरात्रीच्या निमित्ताने 'भैरव भवतारक' या अनोख्या नृत्याविष्काराचे आयोजन करण्यात आले आहे. ११ उदयोन्मुख कलाकारांबरोबर सोमण नृत्य सादर करणार आहेत.
ऋत्विक फाउंडेशन, वेदभवनच्या मागे, कोथरूड : सायं. ७