‘लाइव्ह’ आरोपांची पोलिसांकडून दखल

म. टा. प्रतिनिधी, येरवडा

महाराष्ट्र टाइम्स.कॉम

सोशल मीडियाच्या माध्यमातून एकाने विश्रांतवाडी पोलिस ठाण्याचे पोलिस निरीक्षक (गुन्हे) आणि कर्मचारी यांच्यावर जाहीरपणे गंभीर आरोप केल्याच्या प्रकरणाची पोलिस उपायुक्त पंकज देशमुख यांनी गांभीर्याने दखल घेतली आहे. फेसबुक 'लाइव्ह' करून आरोप करणाऱ्या तक्रारदाराला कागदपत्रे आणि पुरावे घेऊन मंगळवारी सायंकाळी उपायुक्त कार्यालयात बोलावून जबाब घेण्यात आला.

कुंदन लष्करे (रा. विश्रांतवाडी) याने रविवारी दुपारी फेसबुक या सोशल मीडियावर 'लाइव्ह' येऊन विश्रांतवाडी पोलिस ठाण्यातील कार्यरत पोलिस निरीक्षक (गुन्हे) तपास पथकाच्या एका कर्मचाऱ्यावर अनेक गंभीर आरोप केल्याने खळबळ उडाली होती. त्यामुळे लष्करेवर गुन्हा दाखल करायचा की नाही, यावर दिवसभर खलबते चालू होते. याविषयी 'महाराष्ट्र टाइम्स'ने मंगळवारी बातमी प्रसिद्ध केली होती. या प्रकरणाची परिमंडळ ४ चे पोलिस उपायुक्त पंकज देशमुख यांनी गांभीर्याने दखल घेतली.

त्यामुळे उपायुक्त देशमुख यांनी विश्रांतवाडी पोलिस ठाण्याचे वरिष्ठ पोलिस निरीक्षक अरुण आव्हाड यांच्यासह पोलिस निरीक्षक (गुन्हे) रवींद्र कदम आणि कर्मचारी सोमनाथ खळसोडे यांना सोमवारी रात्री कार्यालयात बोलावून घेऊन प्रकरणाची माहिती जाणून घेतली. त्यानंतर पोलिसांवर आरोप करणारा तक्रारदार कुंदन लष्करे याला कार्यालयात बोलावून घेऊन माहिती विचारून घेतली. तक्रारदाराचे म्हणणे एकूण घेतल्यानंतर आरोपांची सर्व कागदपत्रे आणि पुरावे घेऊन मंगळवारी (२१ जुलै) सायंकाळी कार्यालयात हजर राहण्याचे समजपत्र उपायुक्त देशमुख यांनी बजाविले. त्यानंतर लष्करे यांनी सायंकाळी उपायुक्त कार्यालयात जाऊन जबाब नोंदविला आहे. लष्करे पोलिस उपायुक्तांकडे कोणकोणती कागदपत्रे आणि पुरावे सादर करणार, याकडे सर्वांचे लक्ष लागले आहे.