बनावट सोने भासवून फसवणूक करणाऱ्यास अटक
जालना : बनावट सोने भासवून फसवणूक करण्याच्या तयारीत असलेल्या राजस्थानमधील एका भामट्याला स्थानिक गुन्हा अन्वेषण विभागाचे पोलिसांनी रंगेहाथ पकडले. सोन्याचा मुलामा दिलेले एक किलो ३०० ग्रॅम बनावट सोने जप्त केले.
स्थानिक गुन्हा शाखेचे पोलिस निरीक्षक राजेंद्र सिंह गौर यांना नवीन जालना भागातील कडबी मंडी येथे एक व्यक्ती बनावट सोने विक्रीसाठी आला असल्याची माहिती मिळाली होती. त्यानुसार पोलिसांनी सापळा रचून रविवारी भाजी मंडीत बनावट ग्राहक पाठविले. या ग्राहकांसोबत सोन्याची देवाणघेवाण होत असताना इश्वरला त्या ग्राहकांचा संशय आला आणि त्यांने तिथून पळ काढण्याचा प्रयत्न केला. मात्र, आजूबाजूला दबा देऊन बसलेल्या पोलिसांनी त्याला पकडले.
त्याच्या जवळ असणाऱ्या पिशवीची तपासणी केली असता त्याच्याजवळ पिवळ्या धातूच्या मण्यांची माळ सापडली. मात्र, पोलिसी खाक्या दाखवताच मला गुप्त धन मिळाल्यामुळे मी हे सोने कमी किमतीत विकतो असे सांगत ग्राहकांना खोटे सोने विकत असल्याची कबुली दिली. इश्वरसारखीच बनावट सोन्याची विक्री करणारी टोळी राज्यात सक्रीय असल्याचा संशय पोलिसांनी व्यक्त केला.