पुरंदर तालुक्यात बेंदूर उत्साहात

म. टा. वृत्तसेवा, सासवड
शेतात राबणाऱ्या बैलांचा वर्षातील एकमेव ‘बेंदूर’ हा सण शनिवारी पुरंदरच्या अनेक भागात साजरा करण्यात आला. सध्या पावसाने ताण दिल्यामुळे संकटात सापडलेल्या बळीराजाने आपल्या लाडक्या सर्जा-राजांचा हा सण मात्र आनंदाने साजरा करून मुक्या प्राण्यांविषयी कृतज्ञता व्यक्त केली.

शेतकऱ्यांनी सकाळीच बैलांना अंघोळ घातली. त्यानंतर दुपारी बेगड, झूल, रंग, शेम्ब्या, बाशिंग, फुगे, हिंगूळ आदी साहित्याने बैलांना सजवण्यात आले. सायंकाळी गावातून बैलांची सवाद्य मिरवणूक काढण्यात आली. ढोल-ताशा, बँड आणि फटाक्यांच्या आतषबाजीत ही मिरवणूक लक्षवेधी झाली. ग्रामप्रदक्षिणेनंतर सुवासीनींनी बैलांना ओवाळून पुरणपोळीचा घास भरवला. पुरंदरमधील हरगुडे, परिंचे, माहूर आदी भागात बेंदूर साजरा झाला. अन्य भागात हा सण भाद्रपद पोळ्याला साजरा करतात. कृषी संस्कृतीमध्ये बैलांबद्दल कृतज्ञता व्यक्त करण्यासाठी या सणाचे महत्त्वाचे स्थान आहे.