म. टा. प्रतिनिधी, पुणे
ख्रिस्त बांधवांच्या ४० दिवसांच्या उपवासाला आज, बुधवारपासून (२६ फेब्रुवारी) सुरुवात होत आहे. या उपवासानिमित्त बहुतांश चर्चमध्ये विविध प्रार्थनांचे आयोजन करण्यात आले आहे. उपवासाच्या पहिल्या दिवसाला 'राखेचा बुधवार' असे म्हणतात. देवाला प्रिय असलेला उपवास म्हणूनही या उपवासाची ओळख आहे, अशी माहिती 'चर्च ऑफ दी होली नेम'चे सहसचिव सुधीर चांदेकर यांनी दिली.
ख्रिस्त बांधव या ४० दिवसांत कोणतेही धार्मिक कार्य अथवा उत्सव करीत नाहीत. आपापल्या पद्धतीने समय प्रार्थना, मनन, चिंतन आणि उपवास करतात. देवाला प्रिय असा उपवास म्हणजे नम्रता आणि प्रीतीची कृती. आपल्या आध्यात्मिक उन्नतीसाठी उपवास केला पाहिजे, अशी आम्हा सगळ्यांची भावना आहे. त्यामुळे पुढील १० दिवस रास्ता पेठेतील ख्राइस्ट चर्च, चर्च ऑफ द होली नेम, मेथडी मराठी चर्च, सीएनआय, इम्यॅन्युअल चर्च, सेंट मेरी चर्च अशा विविध चर्चमध्ये भक्तीसाठी सकाळी आणि संध्याकाळी विविध कार्यक्रम आयोजित करण्यात आले आहेत. उपवास समयात गरजू, आजारी व्यक्तींची आठवण ठेवून, त्यांना मदत करण्यात येणार आहे. मागील सर्व पापे, अन्याय विसरून ईश्वराला पश्चात्तापाने प्रार्थना करण्यात येणार आहे, असे चांदेकर यांनी सांगितले.