पुणे : शहरात मोठ्या प्रमाणात फोफावलेल्या अतिक्रमणांवर कारवाई करण्यासाठी पाच परिमंडळ कार्यालयांतर्गत १५ स्वतंत्र टीम कार्यान्वित करण्यात आल्या असून, कारवाईचा वेग वाढविण्यात येणार असल्याचे महापालिकेने बुधवारी स्पष्ट केले. अतिक्रमण विभागाने दोन टप्प्यांत कारवाई करण्याचे नियोजन केले असून, वेळप्रसंगी पोलिसांची मदतही घेण्यात येणार आहे.
शहरामध्ये बहुतेक सर्वच भागांमध्ये रस्ते आणि पदपथांवरील अतिक्रमणे मोठ्या प्रमाणात फोफावली आहेत. त्याबाबत वारंवार तक्रारी करूनही अतिक्रमण विभागाचे दुर्लक्ष होत असल्याने नागरिकांना त्रास सहन करावा लागत आहे. अधिकृत फेरीवाल्यांचे पुनर्वसन अद्याप रखडले असतानाच, त्यांची संख्या वाढत आहे. या अतिक्रमणाला आळा घालण्यासाठी महापालिकेने पुढील १५ दिवसांत मोठ्या स्वरूपात कारवाईचे नियोजन केले आहे. प्रत्येक परिमंडळ कार्यालयांतर्गत तीन स्वतंत्र पथके स्थापन करण्यात आली असून, त्यांच्याकडून संबंधित भागांतील अतिक्रमणांवर कारवाई केली जाणार असल्याचे संकेत अतिक्रमण विभागप्रमुख माधव जगताप यांनी दिले. पुढील १० ते १५ दिवसांत शहराच्या वेगवेगळ्या भागांमध्ये कारवाई केली जाणार असून, रस्ते आणि पदपथ पूर्णत: अतिक्रमणमुक्त करण्यात येतील, असा विश्वास त्यांनी व्यक्त केला.