म. टा. प्रतिनिधी, पुणे
भाजपने आगामी लोकसभा निवडणुकीच्या तयारीसाठी शुभारंभ लॉन्स येथे बोलावलेल्या बैठकीस केवळ निमंत्रितच उपस्थित होते, अशी टिप्पणी करून भाजपचे प्रदेशाध्यक्ष रावसाहेब दानवे यांनी खासदार संजय काकडे यांच्या बैठकीतील अनुपस्थितीबाबत खुलासा केला. या बैठकीसाठी १०१ पैकी ९० नगरसेवक उपस्थित राहिल्याने पक्षातील गटबाजीच्या चर्चेलाही विराम मिळाला आहे, अशीही प्रतिक्रिया ज्येष्ठ नेत्यांनी बैठकीनंतर व्यक्त केली.
सर्व नगरसेवक, पदाधिकाऱ्यांनी मे महिन्यापर्यंत इतर कामे सोडून केवळ पक्षासाठीच वेळ द्यावा. देशात काय चालले, यापेक्षा आपल्या प्रभागात काय चालले याकडे अधिक लक्ष द्यावे, असे आदेश दानवे यांनी या बैठकीत दिल्याचे समजते. खासदार काकडे यांना भाजपच्या बैठकांचे निमंत्रण देण्यात येऊ नये, असे आदेश पक्षात फिरल्याची जोरदार चर्चा आहे. त्यातच काकडे शुभारंभ लॉन्स येथील बैठकीला अनुपस्थित राहिल्याने दानवे यांना याबाबत विचारणा झाली. त्यावर दानवे यांनी या बैठकीसाठी निमंत्रितच उपस्थित होते. जी यादी बनवली होती तेच या बैठकीस आले, अशी प्रतिक्रिया व्यक्त केली. काकडे काँग्रेसकडून पुण्यात लोकसभा निवडणूक लढविण्याची चर्चा असल्याच्या प्रश्नावरही दानवे यांनी प्रतिक्रिया देणे टाळले. दरम्यान, दानवे यांनी बोलावलेल्या बैठकीला सर्व नगरसेवक, पक्षाच्या पदाधिकाऱ्यांनी उपस्थित राहण्याच्या सूचना दिल्या होत्या. त्यानुसार या बैठकीसाठी ९० नगरसेवक उपस्थित राहिले.
दानवे यांनी बैठकीच्या सुरुवातीलाच शक्तिप्रमुख, पन्नाप्रमुखांची नियुक्ती, सोशल मीडिया सेलची सद्यस्थिती अशा संघटनात्मक बाबींचा आढावा घेतला. पक्षाचे संघटन मंत्री विजय पुराणिक यांनी आगामी काळातील पक्षाकडून घेण्यात येत असलेल्या कार्यक्रमांची माहिती देऊन नगरसेवक, पदाधिकाऱ्यांकडून अपेक्षित असलेली कामे काय, याची माहिती दिली. पालकमंत्री गिरीश बापट, खासदार अनिल शिरोळे यांनीही उपस्थितांशी संवाद साधला. दानवे यांनी सर्व नगरसेवकांना पुढील मे महिन्यापर्यंत केवळ पक्षाची कामे करण्याचे आदेश दिले. आतापर्यंत निवडणुका जिंकण्यासाठी प्रयत्न करत होतो. मात्र, यापुढे केवळ निवडून येण्यासाठीच कामाला लागा, असेही त्यांनी उपस्थितांना सांगितले.