म. टा. प्रतिनिधी, पुणे
शहर व आजूबाजूच्या परिसरात अनेकदा पक्षी जखमी होतात. उपचारांअभावी त्यांचा मृत्यू होतो. त्यामुळे या जखमी पक्ष्यांना वेळेत उपचार मिळावेत, यासाठी पुण्यात पहिले पक्षी रुग्णालय उभारणार आहे. येत्या वर्षभरात पक्ष्यांवर उपचार करणारे चांगले रुग्णालय सेवेत दाखल होईल, अशी घोषणा सर्वजीव मंगल प्रतिष्ठानचे संस्थापक व फिजिशियन डॉ. कल्याण गंगवाल यांनी केली.
डॉ. गंगवाल यांचा पंच्याहत्तरीनिमित्त समाजातील मान्यवरांच्या व आप्तेष्टांच्या वतीने विशेष सत्कार करण्यात आला. या सत्काराला उत्तर देताना ते बोलत होते. या सत्कार सोहळ्यावेळी डॉ. गंगवाल यांच्या पत्नी डॉ. चंद्रकला गंगवाल, पत्रकार सुनील माळी, नगरसेवक आबा बागुल, डॉ. विकास आबनावे, कर्करोगतज्ज्ञ डॉ. मनीष जैन आदी उपस्थित होते. डॉ. आनंद गंगवाल यांनी कार्यक्रमाचे सूत्रसंचालन केले. डॉ. पारितोष गंगवाल यांनी आभार मानले.
प्रतिष्ठानच्या माध्यमातून गेली ५० वर्षे सातत्याने सदाचार, शाकाहार आणि व्यसनमुक्ती या क्षेत्रात काम करत आहे. पंच्याहत्तरीनिमित्त येत्या वर्षात अत्याधुनिक सोयीसुविधांनी युक्त असे महाराष्ट्रातील पहिले पक्ष्यांचे रुग्णालय बांधण्याचा संकल्प आहे. या माध्यमातून जखमी; तसेच आजारी पक्ष्यांचा उपचार करण्यात येईल.
- डॉ. कल्याण गंगवाल, सर्वजीव मंगल प्रतिष्ठान