पहिले गोदाम ‘महामेट्रो’कडे

पुणे : राज्य सरकारने शिवाजीनगर येथील धान्य गोदामाची जागा महाराष्ट्र मेट्रो रेल्वे कॉर्पोरेशनला (महामेट्रो) देण्याचे आदेश दिल्यानंतर मंगळवारी पहिल्या गोदामाचा ताबा महामेट्रोला मिळाला. यापुढील, काळात जिल्हाधिकाऱ्यांमार्फत इतर गोदामांचा ताबा प्राप्त झाल्यानंतर या ठिकाणी प्रत्यक्ष कामाला सुरुवात होईल.
पुणे मेट्रो प्रकल्पाच्या पिंपरी-चिंचवड ते स्वारगेट आणि वनाझ ते रामवाडी या मार्गिकांच्या इंटर-चेंज स्टेशनसाठी धान्य गोदामाच्या जागेची मागणी ‘महामेट्रो’ने सरकारकडे केली होती. पुणे महानगर प्रदेश विकास प्राधिकरणाच्या (पीएमआरडीए) शिवाजीनगर-हिंजवडी मेट्रो याच ठिकाणाहून सुरू होणार असल्याने सरकारने गोदामाची २.६७ हेक्टर जागा महामेट्रोला देण्याचे निर्देश नुकतेच दिले होते. सरकारच्या आदेशानंतर गेल्या आठवड्यात महामेट्रो आणि जिल्हाधिकारी कार्यालयाच्या अधिकाऱ्यांनी या जागेची पाहणी केली. त्याची मोजणी पूर्ण झाल्यानंतर या जागेवरील एकूण १५ गोदामांपैकी एका गोदामाचा ताबा मंगळवारी महामेट्रोला देण्यात आला. उर्वरित काही गोदामांमध्ये नागरी सुविधा केंद्र आणि इतर सरकारी कार्यालयांचे कामकाज सुरू आहे. त्यांना पर्यायी जागेत स्थलांतरित केल्यानंतर सर्व गोदामांचा ताबा महामेट्रोकडे देण्यात येणार आहे.