‘ससून’मध्ये झाले पहिले अवयवदान

पुणे : ससून हॉस्पिटलमध्ये प्रथमच ब्रेनडेड व्यक्तीच्या अवयवांचे गरजू पेशंटना दान करण्यात आले. संबंधित ब्रेनडेड व्यक्तीचे अवयव काढण्याची प्रक्रिया रात्री उशिरा तज्ज्ञ डॉक्टरांकडून हाती घेण्यात आली.
मुंबईतील केईएम, सायन तसेच अन्य नागपूर, औरंगाबादसारख्या सरकारी हॉस्पिटलमध्ये अवयवदान प्रक्रियेला अद्याप सुरुवात झालेली नाही. मात्र, ससून हॉस्पिटलमध्ये अधिष्ठाता डॉ. अजय चंदनवाले यांच्या पुढाकाराने या मोहिमेला प्रारंभ झाला. अवयवदान मोहिमेतील अवयवदान प्रक्रियेचा हा दुसरा टप्पा पार करण्यात ससूनने आघाडी घेतली आहे.
‘कोकणातील वैभववाडी येथील २९ वर्षाच्या तरुणाचा पुण्यात अपघात झाला. उपचारादरम्यान तो ससून हॉस्पिटलमध्ये ब्रेनडेड झाल्याने त्याचे यकृत आणि मूत्रपिंडाचे दान करण्याचा निर्णय घेण्यात आला. मृत तरुणाचे अवयव काढण्याच्या प्रक्रियेला रात्री उशिरा सुरुवात करण्यात येणार आहे. ग्रीन कॉरिडॉरच्या माध्यमातून पुण्यातून सातवे हृदय आणि पहिले फुफ्फुस चेन्नई येथील पेशंटला जीवदान देण्यासाठी पाठविण्यात येणार आहे,’ अशी माहिती ससूनच्या सूत्रांनी ‘मटा’ला दिली.