पहिले मेट्रो स्टेशन मोरवाडी चौकात

पंधरा मीटर उंचीवर होणार उभारणी

म. टा. प्रतिनिधी, पिंपरी
पुणे मेट्रोच्या पिंपरी-चिंचवड ते स्वारगेट या पहिल्या टप्प्याचे पहिले स्टेशन हे पंधरा मीटर उंचीवर (सुमारे पाच मजले) असणार असून, त्यासाठी मोरवाडी चौकात इमारत बांधण्यात येणार आहे. ट्रॅक कनेक्टर (ट्रॅक चेंजर) हा मोरवाडी चौकापासून २०० मीटर मागे म्हणजेच सेंट्रल मॉलपर्यंत जाणार असून, खराळवाडीपर्यंत ही मेट्रो सर्व्हिस रोडने नेण्यात येणार आहे. सध्या पिंपरी-चिंचवड ते रेंजहिल्स या टप्प्याचे काम सुरू झाले.

पिंपरी-चिंचवड महानगरपालिकेच्या इन गेटजवळ मेट्रोचे पहिले स्टेशन असणार आहे. त्यासाठी अहिल्यादेवी चौक (मोरवाडी) येथील खासगी जागेपैकी काही जागा मेट्रोसाठी ताब्यात घेण्यात येणार आहे. यासंदर्भात खासगी जागा मालकाशी प्राथमिक बोलणी देखील करण्यात आली आहे. चौकातील भविष्यातील वाढणारी वाहतूक आणि मेट्रो स्टेशनला प्रवाशांना सहज जाता यावे यासाठी उंचीवर स्टेशन बांधण्याचे निश्चित झाल्याचे समजते. स्टेशन उंचीवर असले तरी त्यासाठी लिफ्ट सरकते जिने बांधण्यात येणार आहेत.

सुरुवातीला मेट्रोचा ट्रॅक कनेक्टर हा बँक ऑफ महाराष्ट्र पर्यंत असल्याचे निश्चित झाले होते. परंतु, त्यानंतर त्यात काही तांत्रिक बदलामुळे आता हे कनेक्टर २०० मीटर मागे जाणार आहे. त्यामुळे आता त्यादृष्टीने जमिनीची तपासणी करण्याचे काम मोरवाडीपासून काही अंतर मागेपर्यंतच्या रस्त्यावर सुरू झाले आहे. दरम्यान, मोरवाडी ते खराळवाडी या पट्ट्यात मेट्रो सर्व्हिस रस्त्याने जाणार आहे. महापालिका इमारतीच्या पार्किंग जवळून पिंपरी चौक ते खराळवाडी पादचारी पुलाच्या अलीकडेपर्यंत मेट्रो सर्व्हिस रोड तर त्यानंतर ग्रेडसेपरेटरमधून मेट्रो वळविण्यात येणार आहे. वाहतुकीची समस्या टाळण्यासाठी ग्रेडसेपरेटरमधून मेट्रोचा मार्ग बनविण्यात येत आहे.