म. टा. प्रतिनिधी, पुणे
चीनमधून आलेल्या प्रवाशांपैकी आणखी पाच जण 'निगेटिव्ह' असल्याने ते रुग्ण महाराष्ट्रात परतले आहेत. त्यामुळे महाराष्ट्रात परतलेल्या रुग्णांची संख्या ४१ झाली आहे. आतापर्यंत राज्यात ७४ जणांना स्वतंत्र कक्षात ठेवण्यात आले होते. त्यापैकी ७१ जणांची चाचणी 'निगेटिव्ह' असल्याने त्यांना घरी सोडण्यात आले आहे.
एअर इंडियाच्या विशेष विमानाने चीनच्या वुहान भागातून भारतात आलेल्या प्रवाशांना दिल्ली आणि मानेसर आर्मी कॅम्प येथे स्वतंत्र कक्षात ठेवण्यात आले होते. १४ दिवसांचा कालावधी संपुष्टात आल्यानंतर आणखी पाच प्रवासी महाराष्ट्रात परतले आहेत. काल ३६ प्रवासी राज्यात आले होते. वुहान येथून राज्यात परतलेल्या प्रवाशांची संख्या ४१ झाली आहे. या सर्व प्रवाशांचा १४ दिवसांपर्यंत आरोग्याचा पाठपुरावा करण्यात येणार आहे. मुंबई आंतरराष्ट्रीय विमानतळावर ४३ हजार ३१ प्रवासी तपासण्यात आले आहेत. बाधित भागातून आलेल्या प्रवाशांचा शोध क्षेत्रीय सर्वेक्षणातूनही घेण्यात येत आहे. आजपर्यंत राज्यात बाधित भागातून २७४ प्रवासी आले आहेत. आतापर्यंत राज्यात ७४ जणांना भरती करण्यात आले होते. ७१ जणांचे प्रयोगशाळा नमुने 'निगेटिव्ह' असल्याने त्यांना घरी सोडण्यात आले आहेत.
पुण्यात आणखी चौघे 'नायडू'त
पुण्याच्या नायडू संसर्ग रुग्णालयात आणखी दोन दिवसांत चार जणांची भरती करण्यात आली आहे. चारही पुरुष असून, काल दोन जण आणि आज दोघांची भरती करण्यात आली आहे. थायलंडवरून दोन जण प्रवास करून आले आहेत, तर सिंगापूर, जपानमधून प्रत्येकी एक जण आले आहेत. त्या चौघांना सर्दी, ताप, खोकला अशी लक्षणे दिसून येत होती. त्या चौघांचे घशातील द्रव चाचणीसाठी 'एनआयव्ही'ला पाठविण्यात आले आहेत. आतापर्यंत ३२ जणांची भरती करण्यात आली आहे. त्यापैकी २८ जणांना घरी सोडण्यात आले आहे. चौघांच्या चाचणीच्या अहवालाची प्रतीक्षा आहे.
000
'कुक्कुट उत्पादनांचा
'करोना'शी संबंध नाही'
कुक्कुट पक्षी व कुक्कुट उत्पादने यांचा 'करोना'च्या विषाणूच्या प्रादुर्भावाशी कोणताही संबध नाही. कुक्कुट मांस व कुक्कुट उत्पादने मानवाला खाण्यासाठी पूर्ण सुरक्षित आहेत. नागरिकांनी अशा अफवांकडे दुर्लक्ष करावे; तसेच काही शंका असल्यास पशुसंवर्धन विभागाशी संपर्क साधावा, असे आवाहन पशुसंवर्धन आयुक्त सचिंद्र प्रताप सिंह यांनी केले.
'राज्य कुक्कुटपालन व्यवसायात देश अग्रेसर आहे. सन २०१९-२० च्या पशुगणनेनुसार, राज्यात एकूण कुक्कुट पक्षी संख्या ७ कोटी ४२ लाख इतकी आहे. चीनमधील करोना विषाणूचा संसर्ग राज्यात कुक्कुट मांस, इतर कुक्कुट उत्पादनांच्या आहारातील उपयोगाबाबत समाजमाध्यमावर अशास्त्रीय माहिती पसरविली जात आहे. कुक्कुटपालनाच्या व्यवसायाशी लाखो शेतकऱ्यांचा चरितार्थ अवलंबून आहे. मका व सोयाबीन उत्पादक शेतकरी विशेषत:, कुक्कुटपालन उद्योगाशी संलग्न आहेत. कुक्कुट मांस व कुक्कुट उत्पादनांच्या सेवनामुळे मानवात 'करोना' संक्रमित झाल्याचे संदर्भ नाहीत. आपल्याकडे चिकन व मटण उकळून, शिजवून सेवन केले जाते. त्या तापमानात कुठलेही विषाणू जिवंत राहू शकत नाहीत. त्यामुळे कोणत्या अफवांवर लक्ष ठेवू नये,' असे आवाहन सिंह यांनी केले.