म. टा. प्रतिनिधी, पुणे
मुख्यमंत्री देवेंद्र फडणवीस यांची पुण्यातील महाजनादेश यात्रा आटोपताच शहरभर लागलेल्या हजारो फ्लेक्सवर कारवाईचा बडगा महापालिका प्रशासनाने उगारला आहे. गेल्या दोन दिवसांत महापालिका प्रशासनाने दीड हजार जाहिरात फलक, ७७० पोस्टर, ७०६ झेंडे अशा सुमारे साडेचार हजार फ्लेक्स, बॅनर्स, झेंडे, जाहिरात फलक यावर कारवाई केली आहे. दरम्यान, शहरभर मोठ्या प्रमाणात फ्लेक्स लावल्याने झालेल्या विद्रूपीकरणास महापालिका प्रशासनाने एकप्रकारे मूकसंमती दिल्याचा प्रकारही गेले तीन दिवस दिसला.
मुख्यमंत्री फडणवीस यांची महाजनादेश यात्रा शनिवारी पुण्यात दाखल झाली होती. या यात्रेच्या स्वागतासाठी सत्ताधारी भारतीय जनता पक्षाचे पदाधिकारी, नगरसेवक, विद्यमान आमदारांसह विधानसभेसाठी इच्छुक असणाऱ्यांकडून या यात्रेच्या ३५ किलोमीटरच्या मार्गावर काही हजार फ्लेक्स, पोस्टर्स, झेंडे लावण्यात आले होते. महापालिकेचे उड्डाणपूल, पदपथ, चौक, विद्युत पोल तसेच जागा मिळेल त्या ठिकाणी या मार्गावर फ्लेक्स 'सजविण्यात' आले होते. शुक्रवारी आणि शनिवारी लागलेल्या या फ्लेक्सवर कुठलीही कारवाई महापालिका प्रशासनाकडून करण्यात आली नव्हती. प्रसारमाध्यमांनी याबाबत रविवारी जोरदार आक्षेप घेऊन टीका केल्यानंतर सकाळपासूनच महापालिका प्रशासन कामाला लागले आणि त्यांनी फ्लेक्सवरील कारवाईस सुरुवात केली.
महापालिका प्रशासनाने दिलेल्या आकडेवारीनुसार सुमारे साडेचार हजार फ्लेक्स, बॅनर्स, झेंडे, जाहिरात फलक यावर कारवाई करण्यात आली आहे. मात्र, हे बेकायदा फ्लेक्स, बॅनर्स, झेंडे, जाहिरात फलक लावणाऱ्या व्यक्तींवर काय कारवाई करण्यात आली, याबाबत मौन बाळगण्यात येत आहे. अशा प्रकारे शहर विद्रूप करणाऱ्यांवर कारवाई करण्याबाबत उच्च न्यायालयाचे स्पष्ट आदेश आहेत. मात्र, सत्ताधारी पक्षाच्या दबावाखाली कारवाई होत नसून उच्च न्यायालायचाही अवमान करण्यात येत आहे. मुख्यमंत्री फडणवीस यांनीही या प्रकाराबाबत नाराजी व्यक्त करत कारवाई करण्याच्या सूचना केल्या आहेत. तसेच, फ्लेक्स लावल्याने उमेदवारी मिळत नाही, असा टोलाही फ्लेक्स लावणाऱ्या इच्छुकांना लगावला होता.
..........
\Bफौजदारी कारवाईचे काय?
\Bशहर विद्रूप करणाऱ्या जबाबदार असणाऱ्या या राजकीय नेत्यांविरोधात फौजदारी कारवाई करण्याचे धाडस महापालिका दाखविणार का, असा प्रश्न या निमित्ताने उपस्थित झाला आहे. शहरात केवळ एका यात्रेसाठी काही हजार बेकायदा फ्लेक्स, झेंडे लावून लाखो नागरिकांना वेठीस धरण्याचा प्रकार गेले दोन दिवस घडला आहे. उच्च न्यायालयाच्या आदेशानुसार यास जबाबदार असणाऱ्यांविरोधात फौजदारी कारवाई तसेच पक्षीय स्तरावर पदाधिकाऱ्यांचे निलंबन, पक्षाचे सदस्यत्व निलंबित करण्याची कारवाई प्रस्तावित आहे. ही कारवाई करण्याचे धाडस महापालिका तसेच भारतीय जनता पक्ष दाखवणार का?
\B
कारवाई
\Bजाहिरात फलक - १४८१
फ्लेक्स - ५६०
पोस्टर्स- ७७०
झेंडे- ७०६
इतर -१५९
.............
महापालिका प्रशासनाकडून रविवारी सकाळपासून कारवाई करण्यात येते आहे. वॉर्ड स्तरावर तसेच आकाशचिन्ह विभागाकडून कारवाई सुरू आहे. त्यामध्ये फ्लेक्स, बॅनर्स, झेंडे, जाहिरात फलक यावर जोरदार करावाई करण्यात येत आहे.
- शान्तनु गोयल, अतिरिक्त आयुक्त
...........