कर्ज फेडण्यासाठी पोटच्या मुलीचा सौदा

आई-वडिलांसह पाच जणांना अटक

म. टा. प्रतिनिधी, पिंपरी

घरावर असलेले पाच लाखांचे कर्ज फेडून नवा फ्लॅट मिळणार म्हणून आई-बाबाने पोटच्या मुलीचा सौदा केल्याचा धक्कदायक प्रकार सांगवी परिसरात दोन दिवसांपूर्वी उघड झाला होता. वंशाला दिवा हवा म्हणून उत्तम काळे या ४६ वर्षीय शिक्षकाबरोबर १९ वर्षीय तरूणीचे तिच्याच आई-बाबाने जबरदस्तीने लग्न लावून दिले होते. या प्रकरणी सांगवी पोलिसांनी पाच जणांना अटक केली आहे. तरूणीने व्हॉट्सअॅप आणि मोबाईलचा वापर करत याबाबत पोलिसांकडे धाव घेतली होती.

वडील दयानंद गायकवाड, नवरा उत्तम विठ्ठल काळे, आई अनिता दायनंद गायकवाड, मावशी रविंद्र मच्छिंद्र माने, मावशी रुपाली भांदळे, मावशीचा पती राहूल काळुराम भांदळे, मामा रविंद्र माने, आईचा मामा रमेश घुले अशी अटक करण्यात आलेल्यांची नावे आहेत. एकूण १५ जणांवर गुन्हा दाखल करण्यात आला असून, याप्रकरणी १९ वर्षीय तरूणीने सांगवी पोलिस ठाण्यात फिर्याद दिली आहे.

पोलिस उपायुक्त गणेश शिंदे यांनी याबाबत पत्रकार परिषदेत ही माहिती दिली. यावेळी वरिष्ठ निरीक्षक अजय चांदखेडे उपस्थित होते. काळे याचे १५ वर्षांपूर्वी लग्न झाले आहे. त्याला १४ वर्षीय एक मुलगी आहे. परंतु, वंशाला दिवा हवा म्हणून त्याला दुसऱ्यांदा लग्न करायचे होते. यासाठी मध्यस्थांमार्फत त्याने संबंधित मुलीशी लग्न करण्याचे ठरविले. मात्र, या मुलीचा लग्नाला विरोध होता. मात्र, कुटुंबीयांनी मारहाण करून जबरदस्तीने तिचे लग्न लावून दिले होते.

वरिष्ठ निरीक्षक चांदखेडे, सहायक निरीक्षक बलभीम ननावरे, फौजदार शिंदे आदींसह पथकाने आरोपींना अटक केली.