आगामी दोन दिवस तापमान वाढीचे

म. टा. प्रतिनिधी, पुणे

शहरातील उकाडा कायम असून, पुण्यात गुरुवारी ३६ अंश सेल्सिअस कमाल व २२.२ अंश सेल्सिअस किमान तापमानाची नोंद झाली. पुढील दोन दिवसांत तापमानात आणखी वाढ होण्याची शक्यता असून, कमाल तापमान ३८ अंश सेल्सिअसपर्यंत वाढण्याची शक्यता असल्याचा अंदाज हवामान विभागाने वर्तविला आहे.

गेल्या काही दिवसांपासून पुण्यातील कमाल तापमान ३५ अंशांच्या आसपास होते. बुधवारी ३५.८ अंश सेल्सिअस कमाल तापमान नोंदले गेले होते. त्यात गुरुवारी किंचित वाढ झाली, तर किमान तापमानात बुधवारच्या तुलनेत काहीशी घट झाली. मात्र, दिवसभर आकाश अंशत: ढगाळ असल्याने उन्हाचा चटका फारसा जाणवत नव्हता. हवेतील उकाडा मात्र कायम होता. सायंकाळनंतर काही प्रमाणात वारे वाहत असल्याने पुणेकरांना काहीसा दिलासा मिळाला.

दरम्यान, गुरुवारी राज्यातील सर्वाधिक तापमानाची नोंद चंद्रपूर जिल्ह्यातील ब्रह्मपुरी येथे ४५.८ अंश सेल्सिअस इतकी झाली. जळगाव येथे ४०.६, सोलापूर येथे ४०.२, परभणी येथे ४२.९, नागपूर येथे ४४.६, तर वर्धा येथे १७.३ अंश सेल्सिअस इतके कमाल तापमान नोंदले गेले. राज्यातील सर्वांत कमी किमान तापमानाची नोंद महाबळेश्वर येथे (१७.३ अंश सेल्सिअस) झाली.

---