वन विभागाच्या उपचार केंद्राला
मंत्रिमंडळाची मंजुरी
वन विभाग उभारणार
वन्यप्राणी उपचार केंद्र
म. टा. प्रतिनिधी, पुणे
मानवी हल्ल्यामुळे, रस्ता ओलांडताना गाडीची धडक बसल्यामुळे जखमी झालेल्या वन्यप्राण्यांना वैद्यकीय मदत मिळावी, यासाठी वन विभागातर्फे वन्यप्राणी उपचार केंद्र उभारण्यात येणार आहे. बावधन खुर्द परिसरात प्रकल्पाला साकारण्यास मंत्रिमंडळाने सोमवारी मान्यता दिली.
जखमी अवस्थेत सापडणाऱ्या प्राण्यांवर उपचार करण्यासाठी पश्चिम महाराष्ट्रात सक्षम असे एकही केंद्र सध्या कार्यरत नाही. जुन्नरमधील बिबट्यांसाठी वन विभागाने माणिकडोह बिबट निवारा केंद्र काही वर्षांपूर्वी सुरू केले. मात्र, तिथे बिबट्याशिवाय इतर कोणत्याही प्राण्यांवर उपचार केले जात नाहीत. पुण्यात महापालिका आणि एका खासगी संस्थेच्या सहभागातून राजीव गांधी प्राणी संग्रहालयाशेजारी एक वन्यप्राणी अनाथालय आहे; पण त्यावर वन विभागाचे नियंत्रण नाही.
गेल्या काही वर्षात वाढत असलेले वन्यप्राण्यांचे अपघात आणि जखमी प्राण्यांच्या संख्येच्या तुलनेत ही दोन्ही केंद्रे अपुरी पडत आहेत. पश्चिम महाराष्ट्रात कोठेही अपघात घडल्यास वनाधिकाऱ्यांना या केंद्रांवर अवलंबून रहावे लागते आहे. या धर्तीवर वन विभागाने पुण्यात स्वतंत्र अनाथालय स्थापन करण्याचा निर्णय घेतला आहे.
या वैद्यकीय उपचार केंद्रासाठी भूगाव रस्त्याजवळील कोथरूड, मुळशीजवळील बावधन खुर्द, पाचगाव पर्वती- तळजाई टेकडी कुसगाव बुद्रूक हे तीन पर्याय देण्यात आले होते. यावर प्राणिसंग्रहालय प्राधिकरणाच्या तज्ज्ञांनी या तिन्ही स्थळांची पाहणी करून अहवाल सादर केला. त्यानुसार बावधन खुर्दमध्ये प्रकल्प साकारण्यास परवानगी मिळाली आहे.
उपचार केंद्राचा आराखडा आम्ही मंत्रिमंडळाकडे पाठवला होता. हा प्रकल्प एकूण ४८ कोटी रुपयांचा आहे. मंत्रिमंडळाची मान्यता मिळाल्यामुळे आता प्रत्यक्ष कामास सुरुवात होईल. साधारणत: प्रकल्प पूर्ण होण्यास एक वर्षाचा कालावधी लागेल.
- विवेक खांडेकर, मुख्य वनसंरक्षक, वन विभाग (प्रादेशिक)