सिगरेटसाठी काडेपेटी न दिल्यामुळे खून

म. टा. प्रतिनिधी, पुणे

लष्करातील माजी कॅप्टन रवींद्र बाली (वय ६५) यांच्या खुनाचा गुन्हा उघडकीस आणण्यात गुन्हे शाखेच्या पोलिसांना यश आले आहे. या प्रकरणात एका तरुणाला पनवेलजवळून अटक केली आहे. त्याने सिगरेट ओढण्यासाठी काडेपेटी न दिल्यामुळे माजी कॅप्टनच्या डोक्यात सिमेंटचा ब्लॉक घालून खून केल्याचे समोर आले आहे.

रॉबिन्सन ऊर्फ रॉबिन अॅन्थोनी लाझरन (वय २१, रा. तारापूर रोड, दस्तूर बॉइज हायस्कूलसमोर, कॅम्प) असे अटक केलेल्याचे नाव आहे. रॉबिन याचे इंग्रजी माध्यमातून बारावीपर्यंत शिक्षण झाले आहे. खून केल्यानंतर तो पसार झाला होता. पनवले तालुक्यातील पेंदर येथे एका चायनीज गाड्यांवर वेश बदलून काम करत होता, अशी माहिती गुन्हे शाखेचे अतिरिक्त पोलिस आयुक्त प्रदीप देशपांडे व सहायक आयुक्त समीर शेख यांनी पत्रकार परिषदेत दिली.

कॅम्प भागातील डॉ. कोयाजी रोडवर सदर्न कमांड ऑफिच्या मेन गेटजवळील पदपथावर तंबूमध्ये बाली राहत होते. पुण्यात राष्ट्रीय सुरक्षा प्रबोधिनीमध्ये (एनडीए) बाली यांनी शिक्षण घेतले. त्यानंतर त्यांनी लष्करात नोकरी सुरू केली. परंतु, कौटुंबिक वादातून त्यांनी नोकरी सोडून दिली. वीस वर्षांच्या आतच बाली यांनी नोकरी सोडल्याने त्यांना पेन्शन, व्हीआरएसच्या योजनांचा लाभ मिळाला नाही. कुटुंबीयांनीही त्यांना मदत न केल्याने काही दिवस गुजरातमध्ये जाऊन काम केले. गेल्या काही वर्षांपासून सदर्न कमांड ऑफिस मेसबाहेर पदपथावर प्लास्टिकच्या शेडखाली ते राहत होते. एक फेब्रुवारी रोजी रात्री बाराच्या सुमारास दुचाकीवरून आलेल्या व्यक्तींनी केलेल्या मारहाणीत त्यांचा मृत्यू झाला होता. या प्रकरणात लष्कर पोलिस ठाण्यात खुनाचा गुन्हा दाखल करण्यात आला होता. या गुन्ह्याचा तपास गुन्हे शाखेकडून सुरू होता.

या गुन्ह्याच्या अनुषंगाने सीसीटीव्ही फूटेज तपासणी केली जात होती. त्या वेळी एक व्यक्ती अरोरा टॉवरकडे जाताना आढळून आली होती. त्याची माहिती काढली असता ती रॉबिन असल्याचे समजले. गुन्हा घडल्यापासून तो गायब असल्याचे समोर आले. पोलिस निरीक्षक सीताराम मोरे, अतुल साठे, संदीप तळेकर, कल्पेश बनसोडे, महेंद्र पवार यांच्या पथकाने त्याला पनवेल तालुक्यातून अटक केली. त्याच्याकडे चौकशी केल्यानंतर त्याने खुनाची कबुली दिली. राबिन व त्याचा मित्र कुणाल मोरे घटनेच्या दिवशी दारू पिऊन रात्री घरी येत होते. रॉबिन यास सिगरेट ओढण्याची तल्लफ झाली. त्यामुळे त्याने कोयारी रोडवरील फुटपाथवर तंबूत झोपललेल्या बाली यांना काडेपेटी मागितली. बाली यांनी त्याला काडेपेटी दिले नाही. त्यामुळे दोघांमध्ये भांडणे झाली. त्यामध्ये रॉबिन याने तेथील सिमेंटचा ब्लॉक उचलून बाली यांच्या दोन ते तीन वेळा डोक्यात घातला.

वाढदिवस साजरा करून पसार

'रॉबिन हा खून केल्यानंतर दोन दिवस पुण्यातच होता. दोन दिवसांनी त्याचा वाढदिवस होता. तो साजरा करून मग त्याने ओळख पटू नये म्हणून स्वतः चे केस कापले. तसेच, मित्राला घरातून कपडे आणायला लावून अगोदर मुंबईला गेला. त्यानंतर पनवेल येथील पेंदर येथे एका चायनीज गाड्यावर काम करत होता. रॉबिन याच्यावर किरकोळ स्वरूपाचे गुन्हे दाखल आहेत. त्याची आई घरकाम करण्यासाठी परदेशात गेली आहे. तर वडील सरबताची गाडी चालवितात,' अशी माहिती सहायक आयुक्त समीर शेख यांनी दिली.