हर्षवर्धन पाटील शिवबंधन बांधणार?

म.टा. प्रतिनिधी, भवानीनगर

माजी सहकारमंत्री हर्षवर्धन पाटील यांनी सोमवारी मुंबईत मुख्यमंत्री उध्दव ठाकरे यांची भेट घेऊन दीर्घकाळ चर्चा केली. या भेटीमुळे राजकीय वर्तुळात चर्चांना ऊत आला आहे. पाटील शिवसेनेच्या वाटेवर असल्याची चर्चाही मुंबईसह पुणे जिल्ह्यातही सुरू झाली. पाटील यांनी मात्र केवळ साखर उद्योगातील अडचणींच्या मुद्द्यांवरच या बैठकीत चर्चा झाल्याचे सांगून राजकीय चर्चा झाल्याचे नाकारले.

मुंबईत सोमवारी सह्याद्री अतिथीगृहात ही चर्चा झाली. ही भेट झाल्यानंतर राजकीय चर्चेला सुरवात झाली. भाजपने मेगाभरती केल्यानेच सरकार गेले या वक्तव्याने आणि भाजपच्या पक्षांतर्गत आरोप-प्रत्यारोपामुळे मध्यंतरीच्या काळात भाजपमध्ये प्रवेश केलेले राष्ट्रवादी आणि काँग्रेस आघाडीतील आजी-माजी आमदार अस्वस्थ आहेत. भाजपमध्ये सुरू असलेल्या अंतर्गत कलहामुळे पुन्हा स्वगृही परतण्याच्या या नेतेमंडळींच्या चर्चा सुरू आहेत. पाटील सध्या भाजपचे नेते आहेत. भाजप आणि शिवसेनेतून सध्या विस्तवही जात नाही, अशातच हर्षवर्धन पाटील यांनी मुख्यमंत्र्यांची भेट घेतल्याने चर्चेला सुरुवात झाली आहे.

यापूर्वी १९९५ मध्ये इंदापूर विधानसभा मतदारसंघातून हर्षवर्धन पाटील यांनी विकास आघाडीचा प्रयोग करून अपक्ष निवडणूक लढवली. ती जिंकून युतीच्या मंत्रिमंडळात राज्यमंत्री म्हणून कामही पाहिले. त्यानंतर कॅबिनेट मंत्री म्हणूनही काम पाहिले होते. युती सरकारच्या पाच वर्षांच्या काळात त्यांचे शिवसेनेशी, विशेषतः 'मातोश्री'शी घनिष्ट नाते निर्माण झाले होते. शिवसेनाप्रमुखांची विशेष मर्जीही त्यांनी संपादन केली होती. त्यामुळे अचानक पाटील यांनी मुख्यमंत्र्यांची भेट घेतल्याने त्यांच्या शिवसेना प्रवेशाच्या चर्चा रंगू लागल्या आहेत.

मुख्यमंत्री उद्धव ठाकरे यांच्याशी झालेली ही भेट औपचारिक होती. या भेटीत पश्चिम महाराष्ट्रातील साखर उद्योगाच्या प्रश्नांवर चर्चा झाली. मुख्यमंत्री झाल्यानंतर पहिलीच भेट असल्याने त्यांना मुख्यमंत्रिपदाच्या शुभेच्छाही दिल्या.

- हर्षवर्धन पाटील