म. टा. प्रतिनिधी, पुणे
भाजपचे नेते, ज्येष्ठ पत्रकार अरुण शौरी लवासा येथील घराच्या अंगणात फिरताना रविवारी सायंकाळी पावणेसहाच्या सुमारास भोवळ येऊन पडले. त्यामुळे त्यांच्या मेंदूला इजा झाल्याने त्यांना तातडीने रविवारी रात्री रूबी हॉस्पिटलमध्ये दाखल कऱण्यात आले. त्यांची प्रकृती स्थिर असून, त्यांना अतिदक्षता विभागात (आयसीयू) निरीक्षणाखाली ठेवण्यात आले आहे. शौरी सध्या लवासा येथे पत्नीसह वास्तव्यास आहेत. रविवारी सायंकाळी कॉफी घेतल्यानंतर ते घराच्या अंगणात फेऱ्या मारत होते. फेऱ्या मारताना त्यांना अचानक भोवळ आली आणि ते जमिनीवर कोसळले. त्यांच्या डोक्याला तसेच मेंदूला इजा झाली. त्यांच्या संपर्कात असलेल्या डॉक्टरांना कळवून हिंजवडी येथील रुबी हॉस्पिटलमध्ये दाखल करण्यात आले. तेथे त्यांच्यावर प्रथमोपचार करून पुण्याच्या रुबी हॉस्पिटलमध्ये दाखल कऱण्यात आले. त्यांची प्रकृती स्थिर असून, योग्यवेळी डिस्चार्ज देऊ असे डॉक्टरांनी सांगितले.