घरफोडी करणाऱ्या टोळीचा पर्दाफाश

चौघे अटकेत; सव्वाअकरा लाखांचा ऐवज जप्त

म. टा. प्रतिनिधी, पुणे
नेपाळ आ​णि राजस्थान येथील चौघांच्या टोळीने पुण्यात घरफोडीचे आठ आणि चोरीचा एक असे एकूण नऊ गुन्हे केल्याचे उघडकीस आले आहे. चतुःश्रृंगी पोलिसांनी टोळीतील चौघांना गजांआड केले. त्यांच्याकडून सव्वाअकरा लाख रुपयांचा ऐवज जप्त करण्यात आला आहे. या आरोपींनी बंद फ्लॅटचा शोध घेण्यासाठी कारचा वापर केल्याचेही समोर आले आहे.
गजराज मोतीलाल वर्मा (वय ३१, रा. चंदननगर, मूळ रा. राजस्थान), गोरे उर्फ गणेश रथी राणा (वय २६, रा. नेपाळ), सुरेंद्र आस्थाराम चौधरी (वय २२, रा. खराडी बायपास, मूळ रा. राजस्थान) आणि नरपतसिंग पूनमसिंग रजपूत (वय २८, रा. खराडी. मूळ राजस्थान) अशी अटक केलेल्यांची नावे आहेत. त्यांचा साथीदार प्रभू पटेल फरारी झाला आहे, अशी माहिती पोलिस उपायुक्त डॉ. बसवराज तेली, सहायक आयुक्त वैशाली माने आणि वरिष्ठ निरीक्षक दयानंद ढोमे यांनी दिली.
चतुःश्रृंगी पोलिस ठाण्यातील सहायक निरीक्षक संदेश केंजळे यांना मिळालेल्या माहितीनुसार पिंपळे निलखकडून बालेवाडीकडे जाणाऱ्या रस्त्यावर दोन संशयित दरोडेखोर येणार समजले होते. त्यानुसार प्रमोद क्षीरसागर, कर्मचारी बाळासाहेब गायकवाड, अजय येवरीकर, मुन्ना शेख, अजय गायकवाड, संतोष जाधव, मल्हारी चव्हाण, विकास मडके, सारस साळवी, प्रवीण पाटील आणि श्रीनाथ जाधव यांच्या पथकाने त्यांना सापळा रचून ताब्यात घेतले. आरोपींकडे केलेल्या चौकशीत त्यांनी चतुःश्रृंगी पोलिस ठाण्याच्या हद्दीत आठ तर हडपसर परिसरात एक असे घरफोडीचे नऊ गुन्हे केल्याची कबुली दिली. त्यांनी शिवाजीनगर प​रिसरातून एक वॅगनआर कारही चोरली. कार जप्त करण्यात आली आहे, असे तेली यांनी सांगितले.
या आरोपींकडून लोखंडी कटावण्या, ब्लेड, पक्कड, गुप्ती, सीसीटीव्ही कॅमेऱ्यांचे डीव्हीआर मशिन, सिगारेटची पाकिटे, घरफोडी करण्यासाठी लागणारे साहित्य, सोनसाखळी, कर्णफुले, दोन अंगठ्या, चांदीची, तांब्याची भांडी, दोन चारचाकी आणि मौल्यवान वस्तू असा ११ लाख २० हजार रुपयांचा ऐवज जप्त केल्याचे माने यांनी सांगितले.
..
आरोपी सराईत गुन्हेगार
फरारी आरोपी प्रभू याच्याविरोधात २०१२मध्ये कोथरूड पोलिस ठाण्यात गुन्हा दाखल आहे. वर्मा याच्याविरूध्द दहा, गणेश राणाविरूध्द चार आणि सुरेंद्र चौधरीविरूध्द पाच गुन्हे दाखल आहेत. चोरीच्या पैशांतून त्यांनी होंडा सिटी कार खरेदी केली आहे. येरवडा कारागृहात असताना वर्मा आणि चौधरी यांची ओळख झाली होती. चौधरीने रजपूत याला राजस्थानहून पुण्यात घरफोडी करण्यासाठी बोलावले होते, असे ढोमे यांनी सांगितले.