चार कैद्यांना कर्जमाफीचा लाभ

म. टा. प्रतिनिधी, येरवडा
राज्य सरकारने जाहीर केलेल्या छत्रपती शिवाजी महाराज शेतकरी सन्मान योजनेअंतर्गत येरवडा मध्यवर्ती कारागृहातील चार कैद्यांना कर्जमाफीचा लाभ मिळाला आहे. कर्जमाफीसाठी अर्ज केलेल्या नऊ पैकी चार कैद्यांच्या नातेवाइकांच्या बँक खात्यात प्रत्येकी दीड लाख रुपये जमा झाल्याचे प्रशासनाकडून सांगण्यात आले.

येरवडा मध्यवर्ती कारागृहात खून आणि खुनाच्या प्रयत्नाखाली शिक्षा भोगणाऱ्या नऊ शेतकरी कैद्यांनी कर्जमाफीचे ऑनलाइन अर्ज भरले होते. प्रशासनाच्या पुढाकाराने कारागृहातच शेतकरी कैद्यांना ऑनलाइन अर्ज भरून देण्याची सोय उपलब्ध करून देण्यात आली होती. त्यामुळे नऊ कैद्यांना आठ लाख नव्वद हजार रुपयांच्या कर्जमाफीचे अर्ज भरता आले होते.

कारागृहातील नऊ पैकी चार कैद्यांना राज्य सरकारकडून प्रत्येकी दीड लाख रुपये प्रमाणे कर्जमाफी मिळाली आहे. शिक्षा झालेल्या संबंधित चार कैदी शेतकऱ्यांच्या नातेवाइकांच्या बँक खात्यात कर्जमाफीची रक्कम जमा झाली आहे. कर्जमाफीसाठी अर्ज केलेल्या कैद्यांपैकी सहा जण खुनाच्या गुन्ह्यात; तर तीन जण खुनाच्या प्रयत्नाच्या गुन्ह्यात शिक्षा भोगत आहे.

शिक्षा झालेल्या शेतकरी कैद्यांना कारागृहाचे अधीक्षक यू. टी. पवार यांच्या पुढाकाराने कारागृहातच कर्जमाफीचा अर्ज भरून देण्याची सुविधा मिळाल्याने कैद्यांच्या कुटुंबीयांना हा लाभ मिळाला. कर्जमाफीसाठी ऑनलाइन प्रक्रिया पूर्ण करण्यासाठी वरिष्ठ तुरुंगाधिकारी ज्ञानेश्वर खरात यांनी मेहनत घेतली होती.