म. टा. प्रतिनिधी, पुणे
गुन्हे शाखेच्या पोलिसांनी बेकायदेशीरपणे पिस्तूल बाळगणाऱ्या तीन व्यक्तींना अटक करून त्यांच्याकडून चार पिस्तुले आणि पाच जिवंत काडतुसे जप्त करण्यात आली आहे. खंडणीविरोधी पथकाने दोघांना; तर युनिट तीनने ही कारवाई केली आहे.
अझहर चाँद शेख (वय २१, रा. वारजे माळवाडी), सागर नरेंद्र आर्य (२०, रा. भोपळे चौक, वारजे माळवाडी) अशी अटक केलेल्यांची नावे आहेत. खंडणीविरोधी पथकाकडून सोनसाखळी चोरी व सराईत गुन्हेगारांवर लक्ष ठेवण्यासाठी गस्त सुरू होती. त्या वेळी पोलिस हवालदार संजय काळोखे यांना बातमीदारामार्फत माहिती मिळाली, की अझहर शेख हा साथीदारासह पिस्तूल घेऊन मालधक्का चौकाजवळील रेल्वे हॉस्पिटल येथे आला आहे. त्यानुसार वरिष्ठ निरीक्षक रघुनाथ जाधव यांच्या पथकाने सापळा रचून दोघांना ताब्यात घेतले. त्यांची अंगझडती घेतली असता. शेख याच्याकडे एक पिस्तूल व तीन जिवंत काडतुसे आणि आर्य याच्याकडे एक पिस्तूल व एक जिवंत काडतूस आढळून आले. दोघांना ताब्यात घेऊन त्यांच्यावर बंडगार्डन पोलिस ठाण्यात आर्म अॅक्टचा गुन्हा दाखल करण्यात आला आहे. शेख याच्यावर २०१८ मध्ये वारजे माळवाडी पोलिस ठाण्यात गुन्हा दाखल करण्यात आला आहे. या दोघांना १२ फेब्रुवारीपर्यंत पोलिस कोठडीत ठेवण्याचा आदेश कोर्टाने दिला आहे.
गुन्हे शाखा युनिट तीनकडून कोथरूड भागात गस्त सुरू होती. त्या वेळी पोलिस कर्मचारी सचिन गायकवाड यांना माहिती मिळाली, की एकलव्य कॉलेज परिसरात सम्या उर्फ समाधान सिकंदर राऊत (२१, रा. शास्त्रीनगर, कोथरूड) हे येणार आहे. त्याच्याकडे पिस्तूल आहे. त्यानुसार वरिष्ठ निरीक्षक दीपक निकम व उपनिरीक्षक संजय गायकवाड यांच्या पथकाने त्याला पकडले. त्याच्याकडे दोन देशी बनावटीची पिस्तुले सापडली. राऊत हा पोलिसांच्या रेकॉर्डवरील गुन्हेगार असून, त्याच्या विरोधात कोथरूड पोलिस ठाण्यात पाच गुन्हे दाखल आहेत. त्याने हे पिस्तूल कोठून आणले, तो कोणाला विक्री करणार होता याचा तपास सुरू आहे.