म. टा. प्रतिनिधी, पुणे
महात्मा फुले जन आरोग्य अभियानांतर्गत गरिबांवर करण्यात येणाऱ्या अँजिओप्लास्टी, बायपास या हृदयरोगींवरील उपचारासाठी प्रतीक्षा यादी वाढत आहे. त्यासाठी लवकरच कसबा पेठेतील सूर्य सह्याद्री हॉस्पिटलमध्ये अशा हृदयरोगींसाठी स्वतंत्र सुविधा कार्यान्वित करण्यात येणार आहे. त्यामुळे प्रतीक्षा यादी कमी होईल, असा विश्वास व्यक्त होत आहे.
डेक्कन, नगर रस्ता आणि हडपसर येथील सह्याद्री हॉस्पिटलचे प्रमुख डॉ़. केतन आपटे यांनी पत्रकार परिषदेत ही माहिती दिली. या वेळी यकृत प्रत्यारोपण तज्ज्ञ डॉ. बिपीन विभुते, भूलतज्ज्ञ डॉ. मनीष पाठक, इपिलेप्सी सर्जन डॉ. अमित धाकोजी, तसेच व्हॅस्क्युलर अँड इंटरव्हेन्शनल रेडिओलॉजिस्ट डॉ. यादव मुंडे आदी उपस्थित होते.
'महात्मा फुले जन आरोग्य अभियानांतर्गत उपचार करण्यासाठी पेशंटचा सह्याद्री हॉस्पिटलकडे ओढा वाढला आहे. परंतु, हृदयरोगींवर उपचारांसाठी सर्वाधिक पेशंट आहेत. सुमारे तीनशेहून अधिक पेशंट प्रतीक्षा यादीत आहेत. हॉस्पिटलमध्ये बेड फारसे उपलब्ध होत नाहीत. त्यासाठी कसबा पेठेतील सूर्य सह्याद्री हॉस्पिटलमध्ये हृदयरोगींसाठी २० बेड राखीव ठेवण्यात येणार आहे. त्या ठिकाणी महात्मा फुले आरोग्य योजनेंतर्गत सर्वच प्रकारच्या पेशंटवर उपचार, ऑपरेशनची सुविधा करण्यात येणार आहे. त्यासाठी तीन ऑपरेशन थिएटर उभारण्यात येणार आहेत,' अशी माहिती डॉ. केतन आपटे यांनी दिली.
'महात्मा फुले योजनेंतर्गत शंभराहून अधिक पेशंटवर अँजिओप्लास्टी, अँजिओग्राफी, बायपासच्या सर्जरी केल्या आहेत. 'सह्याद्री'मध्ये सर्व प्रकारचे उपचार सुरू आहेत. त्यामध्ये लहान मुलांच्या प्रत्यारोपणाकडे आम्ही लक्ष केंद्रित करीत आहोत. त्यामुळे लहान मुलांचे प्राण वाचण्यास मदत होणार आहे,' असेही त्यांनी या वेळी सांगितले.