म. टा. प्रतिनिधी, पुणे
आकुर्डी येथील कर्मचारी भविष्य निधी संघटनेच्या (ईपीएफओ) कार्यालयात आता दर सोमवारी 'निधी आपके निकट' हा उपक्रम राबविण्यात येणार आहे. या उपक्रमामुळे कंपन्यांचे कर्मचारी आणि मालकांना दर सोमवारी भविष्य निर्वाह निधी (पीएफ) आणि पेन्शनबाबतचे दावे आणि तक्रारींचे निराकरण करता येणार आहे. ११ सप्टेंबरला हा उपक्रम आकुर्डी येथील संजय काळे सभागृहात आणि हिंजवडी येथील बिर्ला सॉफ्टवेअर कंपनीच्या सभागृहात घेण्यात आला होता. आता दर सोमवारी हा उपक्रम दुपारी तीन ते चार या वेळेत राबविण्यात येईल, असे आकुर्डीच्या 'पीएफ' कार्यालयाने कळविले आहे.
कौन्सुल जनरलची भेट
अमेरिकेचे मुंबईतील कौन्सुल जनरल डेव्हिड रान्झ यांनी गुरुवारी केसरीवाड्याला सदिच्छा भेट दिली. या वेळी महापौर मुक्ता टिळक यांनी डेव्हिड यांच्यासमवेतच्या शिष्टमंडळातील सदस्यांचे स्वागत करून, त्यांना लोकमान्य टिळक, टिळक वाडा; तसेच येथील संग्रहालयाची माहिती दिली. टिळक यांनी डेव्हिड यांचे पगडी घालून स्वागत केले आणि त्यांना 'कॉफी टेबल बुक' भेट दिले. या वेळी शिष्टमंडळाने महापौरांसह विविध विषयांवर चर्चा केली. या वेळी डेव्हिड यांनी अमेरिका दौऱ्याचे निमंत्रणही दिल्याचे टिळक यांनी सांगितले.
बसचा लिलाव
रस्त्यावर बंद पडणाऱ्या पुणे महानगर परिवहन महामंडळाच्या (पीएमपी) आयुर्मान संपलेल्या (१२ वर्षांपेक्षा अधिक) ९८ बस पीएमपी प्रशासन भंगारात काढणार आहे. पीएमपीच्या ताफ्यात २४६ सीएनजी बस आणि ५० ई-बस नव्याने दाखल झाल्या आहेत. त्यामुळे पीएमपीचा बसताफा वाढला आहे. परिणामी, आयुर्मान संपलेल्या बस भंगारात काढण्याचा निर्णय प्रशासनाने घेतला आहे. लिलावासाठी पीएमपीकडून निविदा प्रक्रिया राबविण्यात आली आहे. त्यानुसार योग्य किमतीत गाड्यांचा लिलाव करण्यात येणार आहे; तसेच लिलावाच्या बसमधील काही महत्त्वाचे स्पेअर पार्ट काढून, इतर गाड्यांसाठी राखून ठेवले जाणार आहेत, अशी माहिती प्रशासनाने दिली.
…………
मासिकाचे डिजिटायझेशन
राज्य माध्यमिक आणि उच्च माध्यमिक शिक्षण मंडळाच्या 'शिक्षण संक्रमण' मासिकाचे डिजिटायझेशन करण्यात येत असून, त्यासाठी राज्य मंडळाने वेबसाइट आणि अॅपची निर्मिती केली आहे. या माध्यमातून मासिकाचे जुने अंक डिजिटली उपलब्ध करून दिले जाणार आहेत. अभ्यासक्रम, शिकविण्याच्या आणि मूल्यमापनाच्या पद्धती, शिक्षण क्षेत्रातील नव्या संकल्पना आणि उपक्रमाची माहिती देण्याच्या उद्देशाने मंडळातर्फे मासिक प्रसिद्ध केले जाते. आता हे मासिक डिजिटल पद्धतीने उपलब्ध करून दिले जात असून, मंडळाच्या अध्यक्षा डॉ. शकुंतला काळे यांनी या वेबसाइट आणि अॅपचे लोकार्पण केले.