म. टा. प्रतिनिधी, पुणे
सार्वजनिक गणेशोत्सवाच्या शतकोत्तर रौप्यमहोत्सवी वर्षाचे औचित्य साधून आयोजित करण्यात आलेल्या विविध कार्यक्रमांवर लाखो रुपयांची उधळपट्टी करण्याचे धोरण पालिकेतील कारभारी भारतीय जनता पक्षाच्या (भाजप) पदाधिकाऱ्यांनी स्वीकारले आहे.
यंदाच्या वर्षी साजरा होणाऱ्या गणेशोत्सवाची माहिती सोशल मीडिया, वेबसाइटवर देण्यासाठी थीम साँग, व्हिडिओ साँग, बोधचिन्ह तयार करणे; तसेच सार्वजनिक ठिकाणी गणेशोत्सवाच्या जाहिराती करणे, शहरातील भिंती रंगविणे, ‘मराठी बाणा’ कार्यक्रमाचे आयोजन अशा कार्यक्रमांसाठी लाखो रुपये खर्च केले जात आहेत. सार्वजनिक गणेशोत्सवाच्या शतकोत्तर रौप्यमहोत्सवी वर्षानिमित्त भाजपने संपूर्ण गणेशोत्सवावरच पक्षाचा प्रभाव राहील, या दृष्टीने नियोजन केले आहे. गणेशोत्सवानिमित्त मोबाइल अॅप तयार करणे, शहरात दुचाकीची रॅली काढणे, ढोल ताशांचे वादन, शाडू मातीच्या मूर्ती बनविणे, सांस्कृतिक कार्यक्रम असे उपक्रम राबविण्यात येणार असून, त्यासाठी लाखो रुपयांची उधळपट्टी केली जाणार आहे.
शतकोत्तर रौप्य महोत्सवी वर्षानिमित्त पालिकेने खास बोधचिन्ह तयार केले असून यासाठी सुमारे ५० हजार रुपये खर्च केले जाणार आहे. याबरोबरच चार दिवस पालिकेच्या वतीने आयोजित करण्यात आलेल्या कार्यक्रमांची माहिती वर्तमानपत्र, टीव्ही चॅनेलपर्यंत पोहचविण्यासाठी खासगी जनसंपर्क यंत्रणा (पीआर एजन्सी) नेमण्यात आली असून त्यांना साडेचार लाख रुपये शुल्क दिले जाणार आहे. महापालिकेचा स्वतंत्र जनसंपर्क विभाग असतानाही, खासगी यंत्रणा नेमून त्यांच्यावर खर्च करण्याचे कारण काय, अशी विचारणा केली जात आहे. शहरातील विविध भिंती रंगविण्यासाठी १५ लाख रुपयांचा खर्च केला जाणार आहे. तसेच, शहरातील विविध चौकांचे सुशोभिकरण करण्यासाठी आणि फ्लेक्स, जाहिराती लावण्यासाठी २५ ते ३० लाख रुपये खर्च करण्याची तयारी सुरू आहे.
‘मराठी बाणा’ कोणी आयोजित केला?
शतकोत्तर रौप्य महोत्सवी वर्षानिमित्त आयोजित कार्यक्रमाचे उद्घाटन मुख्यमंत्री देवेंद्र फडणवीस यांच्या हस्ते शनिवारी झाले. या कार्यक्रमानंतर अशोक हांडे यांचा ‘मराठी बाणा’ हा कार्यक्रम झाला. मात्र, हा कार्यक्रम नक्की कोणी आयोजित केला, यासाठी किती रुपये खर्च करण्यात आले, याची कोणतीही माहिती पालिकेतील अधिकाऱ्यांना नाही. गणेशोत्सव कार्यक्रमाचे समन्वयक म्हणून काम पाहणारे सुहास मापारी यांना याबाबत विचारणा केली असता, सहआयुक्त सुरेश जगताप यांना विचारा असे त्यांनी सांगितले. जगताप यांना विचारले असता, बालगंधर्व रंगमंदिराचे प्रमुख प्रकाश अमराळे यांना माहिती असेल असे त्यांनी सांगितले. अमराळे यांना विचारले असता महापौर कार्यालयाने हा कार्यक्रम घेतला असून प्रोटोकॉल अधिकारी योगिता भोसले यांना माहिती विचारा, असे उत्तर त्यांनी दिले. तर भोसले यांनी याबाबत मलाच काही माहीत नसल्याचे सांगितले. त्यामुळे हांडे यांचा लोकप्रिय कार्यक्रम केवळ ‘मानाचा नारळ’ देऊन करण्यात आला की काय? अशी चर्चा पालिकेत सुरू आहे.
पुणेकरांच्या पैशाची उधळपट्टी सत्ताधारी पक्ष असलेल्या भाजपने चालविली आहे. गणेशोत्सवाच्या माध्यमातून पक्षाचा प्रचार करण्याचे धोरणच भाजपने सुरू केले आहे. ही करदात्यांच्या पैशांची उधळपट्टी आहे. पक्षनेत्यांच्या बैठकीत वेगळी चर्चा करण्यात आली होती, मात्र प्रत्यक्षात वेगळेच खर्च केले जात आहेत.
अरविंद शिंदे, गटनेते, काँग्रेस
सार्वजनिक गणेशोत्सवाच्या शतकोत्तर रौप्यमहोत्सवी वर्षाचे औचित्य साधून आयोजित करण्यात आलेल्या विविध कार्यक्रमांवर लाखो रुपयांची उधळपट्टी करण्याचे धोरण पालिकेतील कारभारी भारतीय जनता पक्षाच्या (भाजप) पदाधिकाऱ्यांनी स्वीकारले आहे.
यंदाच्या वर्षी साजरा होणाऱ्या गणेशोत्सवाची माहिती सोशल मीडिया, वेबसाइटवर देण्यासाठी थीम साँग, व्हिडिओ साँग, बोधचिन्ह तयार करणे; तसेच सार्वजनिक ठिकाणी गणेशोत्सवाच्या जाहिराती करणे, शहरातील भिंती रंगविणे, ‘मराठी बाणा’ कार्यक्रमाचे आयोजन अशा कार्यक्रमांसाठी लाखो रुपये खर्च केले जात आहेत. सार्वजनिक गणेशोत्सवाच्या शतकोत्तर रौप्यमहोत्सवी वर्षानिमित्त भाजपने संपूर्ण गणेशोत्सवावरच पक्षाचा प्रभाव राहील, या दृष्टीने नियोजन केले आहे. गणेशोत्सवानिमित्त मोबाइल अॅप तयार करणे, शहरात दुचाकीची रॅली काढणे, ढोल ताशांचे वादन, शाडू मातीच्या मूर्ती बनविणे, सांस्कृतिक कार्यक्रम असे उपक्रम राबविण्यात येणार असून, त्यासाठी लाखो रुपयांची उधळपट्टी केली जाणार आहे.
शतकोत्तर रौप्य महोत्सवी वर्षानिमित्त पालिकेने खास बोधचिन्ह तयार केले असून यासाठी सुमारे ५० हजार रुपये खर्च केले जाणार आहे. याबरोबरच चार दिवस पालिकेच्या वतीने आयोजित करण्यात आलेल्या कार्यक्रमांची माहिती वर्तमानपत्र, टीव्ही चॅनेलपर्यंत पोहचविण्यासाठी खासगी जनसंपर्क यंत्रणा (पीआर एजन्सी) नेमण्यात आली असून त्यांना साडेचार लाख रुपये शुल्क दिले जाणार आहे. महापालिकेचा स्वतंत्र जनसंपर्क विभाग असतानाही, खासगी यंत्रणा नेमून त्यांच्यावर खर्च करण्याचे कारण काय, अशी विचारणा केली जात आहे. शहरातील विविध भिंती रंगविण्यासाठी १५ लाख रुपयांचा खर्च केला जाणार आहे. तसेच, शहरातील विविध चौकांचे सुशोभिकरण करण्यासाठी आणि फ्लेक्स, जाहिराती लावण्यासाठी २५ ते ३० लाख रुपये खर्च करण्याची तयारी सुरू आहे.
‘मराठी बाणा’ कोणी आयोजित केला?
शतकोत्तर रौप्य महोत्सवी वर्षानिमित्त आयोजित कार्यक्रमाचे उद्घाटन मुख्यमंत्री देवेंद्र फडणवीस यांच्या हस्ते शनिवारी झाले. या कार्यक्रमानंतर अशोक हांडे यांचा ‘मराठी बाणा’ हा कार्यक्रम झाला. मात्र, हा कार्यक्रम नक्की कोणी आयोजित केला, यासाठी किती रुपये खर्च करण्यात आले, याची कोणतीही माहिती पालिकेतील अधिकाऱ्यांना नाही. गणेशोत्सव कार्यक्रमाचे समन्वयक म्हणून काम पाहणारे सुहास मापारी यांना याबाबत विचारणा केली असता, सहआयुक्त सुरेश जगताप यांना विचारा असे त्यांनी सांगितले. जगताप यांना विचारले असता, बालगंधर्व रंगमंदिराचे प्रमुख प्रकाश अमराळे यांना माहिती असेल असे त्यांनी सांगितले. अमराळे यांना विचारले असता महापौर कार्यालयाने हा कार्यक्रम घेतला असून प्रोटोकॉल अधिकारी योगिता भोसले यांना माहिती विचारा, असे उत्तर त्यांनी दिले. तर भोसले यांनी याबाबत मलाच काही माहीत नसल्याचे सांगितले. त्यामुळे हांडे यांचा लोकप्रिय कार्यक्रम केवळ ‘मानाचा नारळ’ देऊन करण्यात आला की काय? अशी चर्चा पालिकेत सुरू आहे.
पुणेकरांच्या पैशाची उधळपट्टी सत्ताधारी पक्ष असलेल्या भाजपने चालविली आहे. गणेशोत्सवाच्या माध्यमातून पक्षाचा प्रचार करण्याचे धोरणच भाजपने सुरू केले आहे. ही करदात्यांच्या पैशांची उधळपट्टी आहे. पक्षनेत्यांच्या बैठकीत वेगळी चर्चा करण्यात आली होती, मात्र प्रत्यक्षात वेगळेच खर्च केले जात आहेत.
अरविंद शिंदे, गटनेते, काँग्रेस