गणेशोत्सव मंडळेही आता करोना लढ्यात

पुणे : करोनाविरुद्धच्या लढ्यात गणेशोत्सव मंडळेही सक्रिय झाली आहेत. जय गणेश व्यासपीठाच्या माध्यमातून शहराच्या मध्य भागातील २७२ हून अधिक गणेशोत्सव मंडळांनी 'आरोग्योत्सवा'द्वारे प्रत्यक्ष काम सुरू केले आहे. बाधित रुग्णाच्या संपर्कातील व्यक्तींचे माहिती संकलन आणि घरी विलगीकरणासाठीची मदत असे काम मंडळांचे कार्यकर्ते करीत आहेत.

श्रीमंत दगडूशेठ हलवाई गणपती ट्रस्टच्या एसटीडी बूथ येथील 'कोव्हिड मदत केंद्रा'चे उद्घाटन महापालिकेच्या स्थायी समितीचे अध्यक्ष हेमंत रासने यांच्या हस्ते झाले. श्रीमंत दगडूशेठ हलवाई सार्वजनिक गणपती ट्रस्टचे अध्यक्ष अशोक गोडसे, अखिल मंडई गणपती मंडळाचे अध्यक्ष अण्णा थोरात, कसबा गणपती मंडळाचे अध्यक्ष श्रीकांत शेटे, माणिकराव चव्हाण, लोकसहभाग सहनियंत्रण अधिकारी राजेंद्र निंबाळकर, कसबा विश्रामबाग क्षेत्रीय कार्यालयाचे आशिष महादळकर, महेश सूर्यवंशी, शिरीष मोहिते, नितीन पंडित, संजय बालगुडे, अ‍ॅड. प्रताप परदेशी, रवींद्र माळवदकर, भाऊ करपे, सुनील रासने आदी उपस्थित होते.

कार्यकर्ते असे करतील काम...

- क्षेत्रीय कार्यालयाकडून पॉझिटिव्ह रुग्णाबाबतची माहिती महापालिकेचे कर्मचारी रुग्णाच्या भागातील मंडळांच्या प्रतिनिधींना देतील. यामुळे बाधित रुग्णाच्या माहितीसह संपर्कात आलेल्यांची माहिती मिळणे सोपे होईल.

- रुग्णाच्या घरातील सदस्य व त्याच्या संपर्कातील व्यक्तींना सणस ग्राउंड येथील केंद्रात तपासणीसाठी पाठविले जाईल. परिस्थितीनुसार घरीच विलगीकरण करायचे वा हॉस्पिटलमध्ये दाखल करायचे हे ठरविले जाईल.

- प्रातिनिधिक स्वरूपात कसबा-विश्रामबागवाडा या क्षेत्रीय कार्यालयांतर्गत हे काम सुरू होणार आहे. टप्याटप्याने याची व्याप्ती सर्व क्षेत्रीय कार्यालयांतर्गत वाढविण्यात येणार आहे.