करोनाचं सावट: पुण्यातील सार्वजनिक गणेशोत्सव मंडळांनी घेतला मोठा निर्णय

पुणे: पुण्याचे वैभव असलेला सार्वजनिक गणेशोत्सव करोना विषाणूचा धोका पाहता यंदा साधेपणाने साजरा करण्याचा निर्णय मानाच्या पाच आणि काही प्रमुख गणपती मंडळांनी घेतला आहे. गणेशोत्सवाच्या माध्यमातून विधायक कामाचा पायंडा पाडणाऱ्या प्रमुख मंडळांच्या या विधायक निर्णयाचे अनुकरण इतर सर्व मंडळांनी करावे, असे आवाहन करण्यात आले आहे.

घरामध्ये गणपतीची स्थापना नेमकी कुठे करावी? वाचा

कसबा गणपती, तांबडी जोगेश्वरी, गुरुजी तालीम, तुळशीबाग व केसरीवाडा हे मानाचे पाच गणपती तसेच श्रीमंत दगडूशेठ हलवाई सार्वजनिक गणपती ट्रस्ट, अखिल मंडई मंडळ व भाऊ रंगारी मंडळ या प्रमुख गणपती मंडळांनी ऑनलाइन पद्धतीने बैठक घेऊन आगामी गणेशोत्सव साध्या पद्धतीने साजरा करण्याचा निर्णय घेतला. गणेशोत्सवासाठी साध्या पद्धतीने पारंपरिक उत्सव मंडप उभारण्यात येईल. अत्यंत साध्या पद्धतीने पूजा अर्चा, गणेश याग, मंत्र जागर, अथर्वशीर्ष , आरती असे धार्मिक कार्यक्रम करण्यात येतील. उत्सवात नागरिकांच्या आरोग्याची काळजी घेतली जाईल. गणेशोत्सवात नित्य धार्मिक कार्यक्रमांव्यतिरिक्त होणारे इतर सर्व सार्वजानिक कार्यक्रम रद्द करण्याचा निर्णय बैठकीत घेण्यात आला. गणेशोत्सवाचे नियोजन आणि वैभवशाली मिरवणुकीबाबत परिस्थितीनुसार आणि व्यापक समाजहित लक्षात घेऊन निर्णय घेतला जाणार आहे.

पालिका व पोलिस प्रशासनाला पूर्ण सहकार्य करून तसेच सर्व अटी, नियम व शर्तींचे काटेकोरपणे पालन करूनच गणेशोत्सव साजरा करण्यात येईल, असा निर्णय बैठकीत झाला. गणेशोत्सवाच्या स्वरूपाबाबत शहरातील सर्व गणेश मंडळांची बैठक लवकरच घेण्यात येणार आहे.

कंटनमेंट झोनमध्ये नागरिकांच्या संतापाचा उद्रेक झाला अन्...

गणपतीला मास्क नको

आगामी गणेशोत्सवासाठी गणरायाची मूर्ती घडवताना मास्क लावलेली रचना करू नये, तसेच प्रत्यक्ष गणेशोत्सवात मूर्तीला मास्क लावू नये, असे आवाहन मानाच्या गणपती मंडळांनी केले आहे. दरवर्षी विविध प्रकारच्या गणेश मूर्ती घडवताना सामाजिक व मनोरंजन क्षेत्राचा प्रभाव दिसून येतो. सध्या समाजजीवनावर करोनाचा प्रभाव असल्याने त्या विषयाशी निगडीत मूर्ती घडवल्या जाऊ शकतात तसेच तशी सजावट केली जाऊ शकते. मात्र यामुळे गणेशोत्सवाचे पावित्र्य राहणार नाही. म्हणून हे आवाहन करण्यात आले आहे.

उलाढालीला चालना

करोना विषाणूचा धोका लक्षात घेऊन आगामी सार्वजनिक गणेशोत्सव साध्या पद्धतीने साजरा करण्याचा निर्णय घेण्यात आला आहे. प्लेगच्या साथीमुळे शंभर वर्षांपूर्वी गणेशोत्सव अत्यंत साध्या पद्धतीने व मोजक्या लोकांच्या उपस्थितीत साजरा झाला. पुन्हा तशीच परिस्थिती उद्भवल्याने कोणताही डामडौल न करता, कोणालाही त्रास होऊ न देता आणि सारासार विचार करून परंपरेला साजेसा गणेशोत्सव साजरा करण्यात येईल. राज्यातील सर्व सार्वजनिक मंडळांनी साध्या पद्धतीने उत्सव साजरा करावा - अशोक गोडसे, अध्यक्ष- श्रीमंत दगडूशेठ हलवाई सार्वजनिक गणपती ट्रस्ट

करोना रोखण्यासाठी धार्मिक स्थळांचा पैसा ताब्यात घ्या: आंबेडकर