मटा विशेष
---
नशेची 'क्रेझ'
--
Shrikrishna.Kolhe@timesgroup.com
...........
@ShrikrishnaMT
पुणे : पुणे व राज्याच्या विविध भागांत विक्रीसाठी येणारा सर्वाधिक गांजा हा आंध्र प्रदेश, कर्नाटक, मध्य प्रदेश आणि ओडिशा या राज्यांतील नक्षलग्रस्त भागातून येत असल्याची धक्कादायक माहिती पोलिसांच्या चौकशीत समोर आली आहे. अंमली पदार्थ विरोधी पथक व स्थानिक पोलिसांकडून गांजा पकडण्यात आल्यानंतर ही बाब समोर आली आहे. त्यामुळे आता पुण्यात येणारा गांजा रोखण्यासाठी पोलिसांनी मुळावर घाव घालण्याची तयारी सुरू केली आहे.
पुण्यात नशेसाठी गांजाचा सर्वाधिक वापर केला जात असल्याचे समोर आले आहे. कोकेन, ब्राउन शुगर, एमडी, केटामाइन, एलएसडी स्टँप यासारख्या अंमली पदार्थांचा शरीरावर गांजाच्या तुलनेने अधिक परिणाम होत असल्याचे उच्च शिक्षित तरुण आता गांजाच्या नशेकडे वळले आहेत. तसेच, कामगार वर्ग अगोदरपासूनच गांजा कमी किंमती मिळतो म्हणून त्याची नशा करत होता. त्यामुळे गांजाची पुणे व पिंपरी चिंचवडमध्ये मागणी वाढली आहे. पण, या ठिकाणी विक्रीसाठी येणारा सर्वाधिक गांजा हा आंध्र प्रदेश, कर्नाटक, ओडिशा, मध्य प्रदेश या राज्यांतील नक्षलग्रस्त भागातून येत असल्याचे समोर आले आहे. या राज्यात नक्षल प्रभावित अतिदाट जंगलाच्या दुर्गम भागांत नक्षलवाद्यांकडून गांजाचे पीक घेतले जाते. ते महाराष्ट्राबरोबच त्या-त्या राज्यात विक्रीसाठी पाठविले जात असल्याचे समोर आले आहे. पुण्यात येणारा सर्वाधिक गांजा हा कर्नाटक व आंध्रातून येत आल्याचे समोर आले आहे.
कर्नाटकातील बिदरबरोबरच इतर काही ठिकाणी गांजाची शेती केली जाते. तसेच, महाराष्ट्र व आंध्राच्या सीमेलगत असलेल्या नक्षलप्रभावित नारायणखेडा व परिसरात गांजा पिकवून तो राज्यात विक्रीसाठी पाठविला जातो. तसेच, ओरिसामधील गजपती जिल्ह्यातदेखील गांजा पिकवून त्याची विक्री महाराष्ट्रात केली जाते. या ठिकाणाहून पुण्यात गांजाची विक्री करण्यासाठी आलेल्यांना पूर्वीही अटक करण्यात आली आहे. नक्षलग्रस्त भागात गांजाची विक्री शंभर रुपयांपासून ६०० रुपये प्रती किलोपर्यंतच्या दराने केली जाते; तर पुण्यात व मुंबईमध्ये पाच हजार रुपये किलो या दराने केली जाते. पुण्यात गांजाची मागणी वाढल्यामुळे अंमली पदार्थ विरोधी पथकाने गांजा विक्री करणाऱ्या रेकार्डवरच्या गुन्हेगारांवर 'वॉच' वाढविला आहे. त्या राज्यातील तपास यंत्रणा गांजाची शेती पकडण्यास असमर्थ ठरत आहेत. पण, पुणे पोलिसांनी शहरात विक्रीसाठी गांजा येण्याअगोदर त्यांच्यावर कारवाई करण्यासाठी प्रयत्न सुरू केले आहेत. तसेच, गांजाविक्रीचे रॅकेट उद्ध्वस्त करण्याचे काम सुरू आहे, अशी माहिती वरिष्ठ पोलिस अधिकाऱ्यांनी दिली.
-----
गांजा विक्रीतून कोट्यवधीचे उत्पादन
नक्षलवादी त्यांचा प्रभाव असलेल्या जिल्ह्यात गांजाची शेती करतात. पिकविलेला गांजा पुणे, मुंबई व महाराष्ट्रातील इतर शहरे, इतर राज्यांत विक्री करतात. त्यामधून त्यांना वर्षाला कोट्यवधी रुपये मिळतातत. देशातील नक्षल प्रभावित दहा राज्यांमध्ये अवैधपणे, गांजा व अफूची लागवड केली जात असल्याची माहिती पूर्वीच गुप्तचर विभागाने शासनाला दिली आहे. केंद्राने त्यासाठी सॅटेलाइट छायाचित्रांचा आधार घेतला होता. त्यावरून अफू व गांजाच्या शेतीची माहिती शासनाने काढल्यानंतर हजारो एकरवर शेती केली जात असल्याचे आढळून आले आहे. यातून नक्षलवाद्यांना कोट्यवधींचे उत्पादन मिळत असून त्या पैशांचा वापर व्यवस्थेविरोधात केला जात आहेत.
----
मुंबई व गोव्याला पुण्यामार्गे गांजा
मुंबई व गोवा या ठिकाणीदेखील गांजाला मोठी मागणी आहे. त्यामुळे कर्नाटक व आंध्रातून येणारा गांजा पुण्यामार्गेच गोवा आणि मुंबईला जात असल्याचे पोलिसांना आढळून आले आहे. गेल्या काही महिन्यांत पुण्यात वाहतूक पोलिसांनी दोन वेळा तब्बल १९० किलो गांजा पकडला होता. यातील कात्रज चौकात पकडलेला गांजा गोव्याला नेला जात होता; तर, ब्रेमन चौकात पकडलेला १८२ किलो गांजा मुंबईला पाठविण्यात येत होता. या आरोपींकडे केलेल्या चौकशीत त्यांनी पुण्यामार्गेच मुंबई व गोव्याला गांजाची वाहतूक होत असल्याचे सांगितले.