गंगुबाईंचा तानपुरा आज संग्रहालयात

पुणे : राजा दिनकर संग्रहालयातील अनेक दुर्मिळ वस्तू आणि वाद्यांच्या संग्रहात एक खास वाद्य आज, बुधवारी दाखल होणार आहे. ते वाद्य म्हणजे प्रख्यात शास्त्रीय गायिका डॉ. गंगुबाई हनगल यांच्या वापरातील तानपुरा. गंगुबाई यांचा तारांवरून फिरलेला हात आणि त्यांचे स्वर अनुभवलेला हा तानपुरा संग्रहातील वाद्यांचे दालन अधिक समृद्ध करणार असून तानपुऱ्याच्या निमित्ताने गंगुबाई यांचे स्वरबंध पुण्याशी कायमचे जुळले जाणार आहेत.
गंगुबाई हनगल यांच्या वापरातील तानपुरा आज, बुधवारी सकाळी अकरा वाजता राजा दिनकर केळकर संग्रहालयास एका छोटेखानी समारंभात हनगल यांचे नातू अॅड. मनोज हनगल यांच्या हस्ते सुपूर्द करण्यात येणार आहे. नात वैष्णवी हनगल-तलकाड, माधवी जोशी, जावई विश्वजित जोशी, पणती सुहास हनगल, ऐश्वर्या जोशी आणि पणतू मानस जोशी यांची उपस्थिती असेल. यानिमित्ताने एक छोटेखानी मैफल होणार असून हनगल यांचे शिष्य पं. अशोक नाडगीर, वैष्णवी हनगल-तलकाड, बसवराज हिरेमठ, राजेंद्र भागवत यांचे शास्त्रीय गायन व वादन अनुभवता येणार आहे.
गंगुबाई हनगल यांचा जन्म ५ मार्च १९१३ रोजी धारवाड (कर्नाटक) येथे झाला. ९७ वर्षांच्या आयुष्यातील अधिक काळ त्यांनी संगीतासाठी अपर्ण केला. या कालावधीत पद्मभूषण, पद्मविभूषण, नऊ वेळा पंतप्रधान पुरस्कार, पाच वेळा राष्ट्रपती पुरस्कार, सात डी.लिट तसेच विविध पुरस्कार त्यांना मिळाले. त्या कर्नाटक संगीत अकादमीच्या अध्यक्ष तसेच विधानसभेच्या आमदार होत्या. २१ जुलै २००९ रोजी त्यांचे राहत्या घरी निधन झाले. ‘या तानपुऱ्यामुळे संग्रहालयातील वाद्य संग्रहामध्ये मोलाची भर पडणार आहे,’ अशी भावना संग्रहालयाचे संचालक सुधन्वा रानडे यांनी
व्यक्त केली.