पुणे-सावंतवाडी मार्गावर गणपती विशेष गाडी

म. टा. प्रतिनिधी, पुणे

गणेशोत्सवाच्या निमित्ताने कोकणात जाणाऱ्या प्रवाशांची संख्या लक्षात घेऊन मध्य रेल्वेने पुणे ते सावंतवाडी या मार्गावर विशेष गाडी सोडण्याचा निर्णय घेतला आहे. त्यामुळे गणेशोत्सवात पुण्यातून कोकणात जाण्यासाठी प्रवाशांची होणारी गैरसोय टळेल.

ही गाडी १८ ऑगस्ट ते ११ सप्टेंबर या दरम्यान चालणार असून, पुणे-सावंतवाडी-पुणे अशा एकूण आठ फेऱ्या होणार आहेत. पुणे स्टेशनवरून दर शुक्रवारी सायंकाळी चार वाजून ३५ मिनिटांनी गाडी सुटेल. ती शनिवारी पहाटे चार वाजून २० मिनिटांनी सावंतवाडीला पोहोचेल. सावंतवाडी येथून दर सोमवारी सकाळी आठ वाजता गाडी सुटेल. ती नऊ वाजून २५ मिनिटांनी पुण्यात दाखल होईल. या गाडीला १० आरक्षित द्वितीय श्रेणीचे डबे, सहा जनरल डबे आणि दोन स्लिपर डबे असणार आहेत. या गाडीला लोणावळा, पनवेल, रोहा, माणगाव, वीर, खेड, चिपळूण, सावर्डे, संगमेश्वर रोड, रत्नागिरी, आडवली, राजापूर रोड, वैभववाडी रोड, कणकवली, सिंधुदुर्ग, कुडाळ, झाराप, सावंतवाडी रोड हे थांबे देण्यात आले आहेत.