म. टा. प्रतिनिधी, पुणे
आधुनिक वाल्मिकी ग. दि. माडगूळकर यांच्या जन्मशताब्दी सांगतेनिमित्त एक ऑक्टोबर रोजी गदिमा प्रतिष्ठानतर्फे विशेष कार्यक्रमाचे आयोजन करण्यात आले आहे. टिळक स्मारक मंदिर येथे सायंकाळी पाच वाजल्यापासून दोन भागांमध्ये हा कार्यक्रम होणार आहे. उत्तर प्रदेशचे माजी राज्यपाल राम नाईक गदिमांच्या आठवणी जागविणार आहेत. काव्य, गीत, कथा-कादंबरी आणि पटकथा अशा कलाप्रांतातील गदिमांच्या अलौकिक प्रतिभेविषयी प्रसिद्ध कवी प्रवीण दवणे बोलणार आहेत. गदिमांनी लोककलांमध्ये केलेल्या संचाराचा मागोवा घेणारा 'लोकरंग गदिमांचे' हा कार्यक्रम उत्तरार्धात शाहीर हेमंत मावळे आणि होनराज मावळे सादर करणार आहेत. ओवी, अभंग, वृत्तांवर हुकुमत असलेल्या गदिमांनी लावणी, कटाव, पोवाडा, गोंधळ, भारूड, सवाल-जबाब, छक्कड अशा कलाप्रकारांमध्ये केलेल्या विपुल काव्यनिर्मितीचे दर्शन या कार्यक्रमातून घडणार आहे. गदिमा प्रतिष्ठानचे कार्यकारी विश्वस्त आनंद माडगूळकर यांनी ही माहिती दिली. राम कोल्हटकर आणि प्रा. प्रकाश भोंडे उपस्थित होते.
नाट्यसंगीत स्पर्धा
'शतकोत्तर रौप्यमहोत्सव (१२५ वर्ष) साजरा करणारे भरत नाट्य संशोधन मंदिर आणि संवाद, पुणे यांच्यातर्फे सहा आणि सात नोव्हेंबर रोजी बृहन्महाराष्ट्र राज्यस्तरीय खुली संगीत नाट्यप्रवेश आणि नाट्यसंगीत गायन स्पर्धा आयोजित करण्यात आली आहे,' अशी माहिती 'भरत'चे अध्यक्ष आनंद पानसे यांनी दिली. रवींद्र खरे आणि 'संवाद'चे सुनील महाजन उपस्थित होते. मोठी परंपरा असलेली संगीत नाटके आणि नाट्यसंगीताचे संवर्धन व्हावे, या उद्देशातून भरत नाट्य मंदिर येथे स्पर्धेचे आयोजन करण्यात आले आहे. सांघिक प्रथम तीन क्रमांकांच्या; तसेच गायन व अभिनयासाठी वैयक्तिक प्रथम तीन क्रमांकांच्या विजेत्यांसाठी रोख रकमेची पारितोषिके आणि प्रमाणपत्रे देण्यात येणार आहेत. नाट्यसंगीत स्पर्धेमध्ये आठ वर्षांवरील स्पर्धकांना सहभागी होता येईल. २० ऑक्टोबरपर्यंत अर्ज करता येतील.
माजी विद्यार्थिनींना आवाहन
सोलापूर येथील सरस्वती मंदिर शाळेचा शतकोत्तर रौप्यमहोत्सव सोहळा दोन ऑक्टोबरला सोलापुरात पार पडणार आहे. या सोहळ्यात संस्थेच्या राज्यभरातील माजी विद्यार्थिनींनी सहभागी व्हावे, असे आवाहन महोत्सव समितीचे अध्यक्ष अॅड. विजय मराठे यांनी केले आहे. शतकोत्तर रौप्यमहोत्सवानिमित्त दोन ऑक्टोबरला सकाळी दहा वाजता शाळेपासून हुतात्मा स्मृती मंदिरापर्यंत मिरवणूक काढण्यात येणार आहे. त्यानंतर सांस्कृतिक कार्यक्रम सादर केले जाणार आहेत. हा कार्यक्रम दिवसभर चालणार आहे. नावनोंदणी आणि अधिक माहितीसाठी संपर्क : ९९२२११२०६२.
उद्योजकतेवर चर्चासत्र
सावित्रीबाई फुले पुणे विद्यापीठ, आयआयएम-कोलकाता आणि टाटा सोशल एन्टरप्राइझेस यांच्या वतीने 'थिंकिंग सोशल' या विषयावरील चर्चासत्राचे आयोजन नुकतेच करण्यात आले होते. उद्घाटन उपकुलगुरू डॉ. एन. एस. उमराणी यांच्या हस्ते झाले. 'समाजाला सामाजिक उद्योजकतेची आवश्यकता आहे,' असे डॉ. उमराणी यांनी सांगितले. विद्यापीठाच्या सेंटर फॉर इनोव्हेशन, इनक्युबेशन अँड लिंकेजेसच्या संचालक डॉ. अपूर्वा पालकर म्हणाल्या, 'स्टार्टअपकडून सामाजिक समस्यांवर उपाय शोधण्यासाठी प्रयत्न व्हायला हवेत.' स्वप्नील चतुर्वेदी आणि उपमान्य पाटील यांनी त्यांच्या सामाजिक उद्योजकतेच्या यशोगाथा सांगितल्या. गुंतवणूकदार व सामाजिक उद्योजकांच्या 'मेन्टॉर' असलेल्या गीता टोलिया यांनी वित्तपुरवठा व निधी या संदर्भात मार्गदर्शन केले. आयआयएम-कोलकाताचे इन्क्युबेशन पार्कच्या 'मेन्टॉर' सुमन मुखोपाध्याय यांनी स्टार्टअप कोणकोणत्या क्षेत्रात काम करू शकतात, याची माहिती दिली. अमित गोडसे आणि हर्षद भागवत यांनीही या वेळी त्यांच्या यशोगाथा सादर केल्या.
---