म. टा. प्रतिनिधी, पुणे
सातारा महामार्गावरून खेड-शिवापूर परिसरात प्रवासी सेवा देणाऱ्या पुणे महानगर परिवहन महामंडळाच्या (पीएमपी) ११ बसेसाठीचा सहा लाख रुपये टोल द्यावा, अशी मागणी करून टोल प्रशासनाने पीएमपीच्या बस अडवून ठेवल्याचा धक्कादायक प्रकार शनिवारी रात्री घडला. त्यामुळे प्रवाशांची मोठी गैरसोय झाली.
पीएमपीकडून शिवापूर, नसरापूर आणि केतकावळे आदी मार्गांवर ११ बसच्या माध्यमातून प्रवासी सेवा दिली जाते. बसच्या दैनंदिन ४४ फेऱ्या या मार्गावर होतात. त्यासाठी प्रत्येक महिन्यात खेड-शिवापूर येथील टोल नाक्यावर आगाऊ प्रतिमहिना ४० हजार रुपये टोल देण्यात येत होता. गेल्या अनेक वर्षांपासून याच पद्धतीने टोल दिला जात आहे. मात्र, टोलनाका प्रशासनाने टोलच्या रकमेत वाढ केली असून, या ११ बससाठी प्रतिमहिना आगाऊ सहा लाख रुपये टोल द्यावा, अन्यथा बस सोडण्यात येणार नसल्याची भूमिका घेतली आहे. त्यामुळे शनिवारी शिवापूर, नसरापूर आणि केतकावळे आदी मार्गांवरील बस खेड-शिवापूर टोलनाक्यावरच थांबविण्यात आल्या होत्या. त्यामुळे प्रवाशांना याच ठिकाणी उतरविण्यात आले.
'बससाठी सरकारने टोल दर ठरवून दिला आहे. त्याप्रमाणेच आम्ही पीएमपीला दर आकारत आहोत. सर्व वाहनांना 'फास्टॅग' सक्तीचे करण्यात आले आहे. पाच मार्चपासून पीएमपी प्रशासनाला 'फास्टॅग' रिर्चाज करावे, अशा सूचना दिल्या होत्या. मात्र शनिवारपर्यंत रिर्चाज करण्यात आले नाही. जोपर्यंत त्यामुळे 'फास्टॅग'चे रिचार्ज केले जात नाही, तोपर्यंत बस टोलनाक्याच्या पुढे सोडण्यात येणार नसल्याची आडमुठी भूमिका टोलचालकांनी घेतली आहे,' अशी माहिती पीएमपीच्या अधिकाऱ्यांनी दिली.
...तर, प्रतिप्रवासी पाच रुपये भुर्दंड
टोल प्रशासनाच्या मागणीनुसार, नवीन दराने टोल आकारणी झाल्यास प्रतिप्रवासी पाच रुपये जादा भुर्दंड पडणार आहे. म्हणजेच, प्रवाशांसाठी अप्रत्यक्ष तिकीट दरवाढ होणार आहे, असे पीएमपीच्या अधिकाऱ्यांनी सांगितले.
ठळक मुद्दे
११ बस
खेड-शिवापूर परिसरात सेवेसाठीच्या पीएमपी बस
४४
या परिसरात होणाऱ्या बसच्या एकूण फेऱ्या
४० हजार
११ बससाठी प्रतिमहिना आकारण्यात येणारा टोल
६ लाख
टोल प्रशासनाकडून ४० हजाराऐवजी नव्याने मागणी केलेली रक्कम
अचानकपणे टोलच्या रकमेत पंधरापट वाढ करण्यात आली आहे. टोलची रक्कम कमी केली नाही; तर या भागात प्रवासी सेवा देणे पीएमपीला शक्य होणार नाही.
- अनंत वाघमारे, वाहतूक व्यवस्थापक, पीएमपी