म. टा. प्रतिनिधी, पिंपरी
आई रागावल्याने राहत्या घरामध्ये गळफास घेऊन चौदा वर्षीय मुलीने आत्महत्या केल्याची घटना काळेवाडी येथे शुक्रवारी सायंकाळी घडली. सेजल दोरास्वामी मुदलीयार (वय १४, रा. काळेवाडी) असे आत्महत्या केलेल्या अल्पवयीन मुलीचे नाव आहे. पोलिसांनी दिलेल्या माहितीनुसार, सेजल पिंपरीतील एच. ए. स्कूलमध्ये आठवीत शिकत होती. शाळेच्या परीक्षा संपल्यामुळे तिला सुट्टी लागली होती. ती दोन दिवसांत चेन्नई येथील आपल्या गावी जाणार होती. गावाला जाण्यापूर्वी घराची साफसफाई करण्यास आईने सांगितले होते; मात्र, सेजलने साफसफाई न केल्यामुळे आई तिच्यावर रागावली. या कारणावरून सेजलने शुक्रवारी सायंकाळी साडेपाच वाजताच्या सुमारास राहत्या घरामध्ये पंख्याला दोरीच्या साह्याने गळफास घेत आत्महत्या केली. हे तिच्या घरच्यांच्या लक्षात आल्यावर तिला वायसीएम हॉस्पिटलमध्ये नेण्यात आले; मात्र, उपचारापूर्वीच तिचा मृत्यू झाल्याचे डॉक्टरांनी सांगितले. वाकड पोलिस तपास करीत आहेत.