सोन्याची १२० नाणी लुबाडणाऱ्याला अटक

म. टा. प्रतिनिधी, येरवडा
कंपनीतील कामगारांना दिवाळी बोनस म्हणून सोन्याचे नाणे देणार असल्याचे भासवून नगर येथील ज्वेलर्सची ३२ लाख रुपयांची १२० सोन्याची नाणी पळून नेणाऱ्या भामट्याला चंदननगर पोलिसांनी आंध्र प्रदेशातून अटक केली. विशाखापट्टणम आणि केरळमध्येही आरोपीने अनेकांना फसविल्याचे समोर आले आहे. त्याच्याकडून ९३ नाणी जप्त करण्यात आली आहेत.

साबरी अरुमुगम गणेशन (रा. पानडगड, कोचीन, केरळ) असे अटक केलेल्या चोरट्याचे नाव आहे. याप्रकरणी २६ नोव्हेंबर २०१५ रोजी चंदननगर पोलिस ठाण्यात फसवणुकीचा गुन्हा नोंदविण्यात आला होता. खराडी येथील युवान आयटी सेंटरमध्ये आरोपी गणेशन याने काही दिवसांकरिता भाड्याने अलिशान ऑफिस घेतले होते. ऑफिस ला ये–जा करण्यासाठी त्याने कार मध्ये भाड्याने घेतली होती. या दरम्यान खराडीतील कंपनीत काम करणाऱ्या कर्मचाऱ्यांना दिवाळी सणानिमित्त सोन्याचे नाणे भेट द्यावयाचे असल्याचे कार चालकाला सांगितले होते. कार चालकाने नगर येथील एका नामांकित दुकानात काम करणाऱ्या मामाशी संपर्क साधून कंपनीतील कर्मचाऱ्यांना सोन्याची मोठी खरेदी ऑफर असल्याचे सांगितले. पुण्यात येऊन गणेशनशी चर्चा झाल्यानंतर ज्वेलरकडील दोन कर्मचारी सोन्याची १२० नाणी घेऊन पुण्यात आले होते. गणेशन याने नाणे घेऊन रक्कम ‘आरटीजीएस’ने ट्रान्सफर करतो अस सांगून फरारी झाला होता.

विशाखापट्टणममध्ये एका आरोपीला नाण्यांच्या गुन्ह्यात अटक केल्याची माहिती समजताच चंदननगर पोलिस तिथे पोहचले. वरिष्ठ निरीक्षक अनिल पात्रुडकर, उपनिरीक्षक एस. एल. साळुंखे, पोलिस कर्मचारी तानाजी पवार, अजित धुमाळ, श्रीकांत कुरुकेल्ली, अमोल गायकवाड, अमोल पिलाने दत्ता शिंदे यांच्या पथकाने आरोपी गणेशनला विशाखापट्टणम येथे अटक केली.