म. टा. प्रतिनिधी, पुणे
सावित्रीबाई फुले पुणे विद्यापीठाच्या पदवी प्रदान समारंभाच्या इतिहासात प्रथमच सुवर्णपदकप्राप्त विद्यार्थ्यांना प्रमुख पाहुण्यांच्या हस्ते पदके प्रदान करण्यात आली नाही. त्यामुळे पदकप्राप्त विद्यार्थी नाराज झाले होते. प्रमुख पाहुणे राज्यपाल आणि कुलपती भगतसिंह कोश्यारी यांना वेळेची कमतरता असल्याने ही पदके बुधवारी सकाळी मुख्य इमारतीच्या ज्ञानेश्वर सभागृहात कुलगुरू डॉ. नितीन करमळकर यांच्या हस्ते प्रदान करण्यात आली.
या प्रकाराबाबत सुवर्णपदकप्राप्त विद्यार्थी आणि त्यांचे पालक यांच्याकडून नाराजी व्यक्त करण्यात आली. 'शैक्षणिकदृष्ट्या सुवर्णपदक मानाचे असते. समारंभात मंचावर जाऊन सुवर्णपदक स्वीकारण्याच्या क्षणाची आम्ही वाट पाहात होतो. मात्र, कार्यक्रम कमी वेळाचा असल्याने पदके सकाळीच देण्यात आली. हे काही योग्य झाले नाही,' अशा प्रकारे विद्यार्थी आणि पालकांनी नाराजी व्यक्त केली. कोश्यारी यांनी त्यांच्या भाषणात सुवर्णपदके देता न आल्याचा उल्लेख करून, सुवर्णपदकप्राप्त विद्यार्थ्यांना राजभवनावर चहापान आणि गप्पांसाठी निमंत्रित करण्याचे आश्वासन दिले.