पावणे सहा लाख लुटले

ताथवडे उद्यानासमोरील घटना; डोळ्यात टाकले तिखट

म. टा. प्रतिनिधी, पुणे

वाइन शॉपमध्ये जमा झालेली रोकड बँकेत भरण्यासाठी निघालेल्या व्यक्तीच्या डोळ्यात मिरची पूड टाकून पाच लाख ६८ हजारांची रोकड लुटल्याची घटना सोमवारी दुपारी घडली.
दुचाकीवरून आलेल्या व्यक्तींनी ताथवडे उद्यानाजवळ टायर पंक्चर झाल्याचे सांगून रस्त्याच्या कडेला दुचाकी घ्यायला लावली. त्यानंतर मिरचीची पूड डोळ्यात टाकून रोकड पळविली. या प्रकरणी अलंकार पोलिस ठाण्यात गुन्हा दाखल करण्यात आला आहे.
राकेश लक्ष्मणसिंग परदेशी (वय २६, रा. बिबवेवाडी) यांनी तक्रार दिली आहे. त्यावरून तिघांवर गुन्हा दाखल करण्यात आला आहे. पोलिसांनी दिलेल्या माहितीनुसार, परदेशी जिंदाल वाइन शॉपीवर मॅनेजर म्हणून काम करतात. सिंहगड रस्त्यावरील वाइन शॉपीमध्ये शनिवार, रविवारी जमा झालेली रोकड घेऊन ते करिष्मा चौकातील बँकेत भरण्यासाठी दुचाकीवरून जात होते. राजाराम पुलाकडून वळून ताथवडे उद्यानासमोरून जात असताना एका व्यक्तीने त्यांना गाडीचे टायर पंक्चर झाल्याचे सांगितले. त्यामुळे परदेशी दुचाकी रस्त्याच्या बाजूला घेऊन टायर पाहत होते. त्यावेळी काळ्या रंगाच्या पल्सवरून दोघेजण आले. त्यांनी परदेशी यांच्या चेहऱ्यावर तिखट टाकले. डोळ्यात तिखट गेल्यामुळे त्यांना काहीही दिसेनासे झाले. त्या दरम्यान दोघांनी त्यांच्याजवळील रोकड असलेली बॅग हिसकावून पळ काढला.
त्यानंतर परदेशी यांना संतोष हॉलजवळील वाइन शॉप येथे गेले. तेथे त्यांनी चेहरा धुतला. त्यानंतर त्यांनी हॉस्पिटलमध्ये जाऊन उपचार घेतले. त्यानंतर रात्री सातच्या सुमारास त्यांनी अलंकार पोलिसांकडे येऊन घटनेची माहिती दिली. घटना घडल्यानंतर परदेशी यांनी खूपच उशिरा तक्रार दिली.

पोलिसांकडून नाकाबंदी
वर्दळीच्या ठिकाणी घटना घडल्यामुळे पोलिसांची एकच धावपळ उडाली. पोलिसांनी घटनास्थळी धाव घेऊन पाहणी केली. तसेच, शहरात अनेक ठिकाणी नाकाबंदी सुरू करण्यात आली. परदेशी यांच्याकडे चौकशी केली. ही रोकड पाळत ठेऊन लुटल्याची शक्यता पोलिसांकडून व्यक्त करण्यात आली आहे. या प्रकरणी सहायक पोलिस निरीक्षक एस. जी. चव्हाण तपास करत आहेत.