अपंग महिलेला धमकावून चोरी

हडपसरमधील प्रकार; अज्ञातांविरुद्ध गुन्हा दाखल

म. टा. प्रतिनिधी, पुणे

दरवाजाचे कुलूप तोडून घरात शिरलेल्या चोरट्यांनी अपंग महिलेच्या गळ्याला चाकू लावून तसेच मुलाला मारण्याची धमकी देऊन घरातीले सोन्याचे दागिने चोरून नेल्याचा धक्कादायक प्रकार हडपसरमध्ये बुधवारी पहाटे घडला. या प्रकरणी हडपसर पोलिस ठाण्यात गुन्हा दाखल करण्यात आला आहे.
संबंधित महिलेने हडपसर पोलिस ठाण्यात तक्रार दिली आहे. त्यानुसार दोन अनोळखी व्यक्तींवर गुन्हा दाखल करण्यात आला आहे. पोलिसांनी दिलेल्या माहितीनुसार तक्रारदार महिला पंचायत समिती हवेली येथील सर्वशिक्षा अभियानात कार्यरत आहेत. त्यांचे पती पेट्रोल पंपावर कॅशियर आहेत. दोन वर्षापासून हे दाम्पत्य पुण्यात वास्तव्यास आहेत. पती-पत्नी दोघेही अपंग आहेत. संबंधित महिलेचे पती रात्री नऊ ते पहाटे दोन वाजेपर्यंत कार्यरत असतात. रात्री कामाला जाताना पती घराला कुलूप लावून जातात. नेहमीप्रमाणे बुधवारीही ते कामावर जाताना घराला कुलूप लावून गेले.
तक्रारदार आणि त्यांचा मुलगा जेवण करून घरात झोपले होते. रात्री दोन वाजण्याच्या सुमारास त्यांना दरवाजा वाजल्याचा आवाज आला. त्यामुळे तक्रारदार महिलेला जाग आली. पण, पती आल्याचे समजून त्यांनी उठून पाहिले नाही. मात्र, हॉलमधील कपाट उघडल्याचा आणि वस्तू पडल्याचा आवाज आल्यामुळे त्या बेडरूममधून हॉलमध्ये आल्या. त्याचवेळी दोन अनोळखी व्यक्ती घरात घुसल्याचे त्यांना दिसले. त्यांना पाहताच चोरट्यांनी चाकू काढून त्यांच्या गळ्याला लावला आणि गळ्यातील मंगळसूत्र जबरदस्तीने काढून घेतले. तसेच, त्यांना बेडरूममध्ये नेऊन कपाट उघडण्यास सांगितले. मात्र, त्यांनी कपाट उघडण्यास नकार दिला. त्यावेळी चोरट्यांनी त्यांच्या मुलाला जिवे मारण्याची धमकी दिली. त्यामुळे घाबरलेल्या महिलेने कपाट उघडून त्यातील सोन्याचे दागिने दिले.
तक्रारदार अपंग असल्याचा फायदा घेत रोख सात हजार रुपये, सोन्याचे दागिने असा एकूण एक लाख ८८ हजार रुपयांचा माल लंपास केला. चोरटे घरातून बाहेर पडताच महिलेने पोलिस नियंत्रण कक्षाला माहिती दिली.