अधिकारी देणार दोन दिवसांचे वेतन

पुणे : करोनाबाधित रुग्णांच्या उपचारासाठी निधीची कमतरता भासू नये, यासाठी महाराष्ट्र राज्य राजपत्रित अधिकारी महासंघाने एप्रिल आणि मे महिन्यांतील प्रत्येकी एक याप्रमाणे दोन दिवसांचे वेतन मुख्यमंत्री सहायता निधीसाठी देण्याचा निर्णय घेतला आहे.

कार्यरत राजपत्रित अधिकाऱ्यांबरोबरच सेवानिवृत्त राजपत्रित अधिकाऱ्यांनीही दोन दिवसांचे निवृत्तीवेतन देण्यास संमती दिली आहे. उपमुख्यमंत्री अजित पवार यांना याबाबतचे निवेदन महासंघाचे प्रमुख सल्लागार ग. दि. कुलथे, विनोद देसाई, डॉ. सोनाली कदम, नितीन काळे, विनायक लहाडे यांनी दिले.

महाराष्ट्र राजपत्रित अधिकारी महासंघ हा ७० खातेनिहाय राजपत्रित अधिकारी संघटनांचा सरकार मान्यताप्राप्त महासंघ असल्याने अशा पगार कपातीसाठी व्यक्तिगत संमतीची गरज नाही. विशेष म्हणजे बहुतांश सेवानिवृत्त अधिकाऱ्यांनीदेखील एप्रिल आणि मे महिन्यांतील प्रत्येकी एक असे दोन दिवसांचे निवृत्तीवेतन मुख्यमंत्री सहायता निधीस देण्याचा मनोदय महासंघाकडे व्यक्त केला असल्याचे निवेदनात म्हटले आहे. राज्यातील कार्यरत आणि सेवानिवृत्त राजपत्रित अधिकाऱ्यांचे दोन दिवसांचे वेतन किंवा निवृत्ती वेतन मुख्यमंत्री सहायता निधीत परस्पर जमा करण्याबाबतचा आदेश काढण्याबाबत संबंधितांना निर्देश द्यावा, असे या निवेदनात म्हटले आहे.