म. टा. प्रतिनिधी, पिंपरी
राष्ट्रवादी काँग्रेसचा बालेकिल्ला समजल्या जाणाऱ्या पिंपरी-चिंचवड महापालिकेची सत्ता काबीज करण्यासाठी खुद्द मुख्यमंत्री देवेंद्र फडणवीस हेच आता शहराच्या राजकारणात उतरणार अशी चिन्हे दिसू लागली आहेत. पुण्याच्या तुलनेत अधिक वेळ मुख्यमंत्री शहराला देणार असल्याची माहिती पक्षातील सूत्रांनी दिली आहे. परंतु, या सगळ्या आधी पक्षांतर्गत दुफाळी मोडून काढण्याचे आव्हान मुख्यमंत्री फडवणीस यांच्यावर आहे.
भाजपमध्ये येत्या काळात विविध पक्षांतील आजी-माजी नगरसेवक प्रवेश करणार आहेत. परंतु जुना-नव्याचा वाद अद्याप काही मिटलेला नाही. आज, सोमवारी भोसरी येथे आमदार महेश लांडगे यांनी आयोजित केलेल्या कार्यक्रमापूर्वी पश्चिम महाराष्ट्र संपर्क प्रमुख एकनाथ पवार यांनी आयोजित केलेल्या कार्यक्रमाला मुख्यमंत्री उपस्थित राहणार आहेत. त्यामुळे मुख्यमंत्र्यांनी पक्षातील जुन्या पदाधिकारी-नेत्यांना प्रथम प्राधान्य दिल्याची चर्चा देखील शहरात आहे.
दरम्यान, दोन दिवसांपूर्वी इच्छुकांची एक बैठक घेण्यात आली. पक्षाच्या प्रोटोकॉलनुसार ज्या दोन पदाधिकाऱ्यांनी ही बैठक बोलाविणे अपेक्षित होते, त्यांनीच या बैठकीकडे पाठ फिरली. तर नव्याने दाखल झालेल्या पदाधिकाऱ्याने या बैठकीला संबोधित केले. खास करून शहरातील गोपीनाथ मुंडे गटाने या बैठकीला जाण्याचे टाळले. त्यामुळे हा वाद अद्याप कायम असल्याचे दिसून येत आहे. शहराध्यक्ष आमदार लक्ष्मण जगताप यांनी अंतर्गत गटबाजी संपुष्टात आणण्यात काही अंशी यश मिळविले आहे. परंतु पक्षातील जुना-नव्याचा वाद अद्याप पूर्णतः मिटलेले नाही.
नुकत्याच झालेल्या विधानपरिषदेच्या निवडणुकीत शहरातील एकाला तरी उमेदवारी मिळेल अशी अपेक्षा राष्ट्रवादी काँग्रेसला होती. परंतु, तसे झालेले नाही. त्यामुळे नाराजांची संख्या वाढली आहे हे सर्व जाणतात. परंतु, भाजपच्या अंतर्गत दुफाळीमुळे राष्ट्रवादीमधील नाराजांचा फायदा महापालिका निवडणुकीत कितपत प्रमाणात उठविण्यात भाजपला यश मिळेल याबाबत शंका उपस्थित होत आहे. शहरातील भाजपची ताकद वाढविण्यासाठी अनेकांना पक्षात घेतले जात आहे. मात्र, जुन्यांना येत्या काळात उमेदवारी मिळेल का याची धास्ती वाटू लागली आहे.
शहराध्यक्ष आमदार जगताप यांनी जुना-नवीन यापेक्षा ज्याची निवडून येण्याची ताकद आहे अशांनाच तिकीट दिले जाईल, असे सांगितले होते. त्यामुळे अनेकांची चलबिचल सुरू झाली आहे. शहरात भाजपला मानणाऱ्यांचा एक वर्ग आहे. त्यामुळे अशा भागातून इच्छुकांची संख्या वाढली आहे. मागील पंचवार्षिकला दोन नंबरची मत मिळविणाऱ्यांनी प्रचार सुरू केला आहे. जुन्या-नव्याच्या वादात न पडता वेळप्रसंगी अपक्ष निवडणूक लढविण्याची तयारी अनेकांनी केली आहे. मात्र, किमान १०-१२ हजार मत मिळविणाराच विजयी होऊ शकतो, त्यामुळे अपक्ष निवडणूक लढविण्याचे धाडस किती जण करतात हे आगामी काळात स्पष्ट होणार आहे.
राष्ट्रवादी काँग्रेसची वॉर रूम तयार
केंद्रात आणि राज्यात सत्ता मिळविताना भाजपने मोठ्या प्रमाणात सोशल मीडियाचा वापर केला. तसेच लोकांना सारखे ‘हॅमर’ होईल अशा पद्धतीने प्रचार यंत्रणा राबविली होती. पिंपरी-चिंचवडमध्ये भाजपचा शिरकाव रोखण्यासाठी एकहाती सत्ता असलेल्या राष्ट्रवादी काँग्रेसने सोशल मीडियाची मोठी मदत घ्यायचे ठरविले आहे. त्यासाठीची वॉर रूम तयार करण्यात आली आहे. विशेष म्हणजे ही वॉर रूम तयार करून देणाऱ्यांची आणि इच्छुकांची बैठक लावणे, कोणत्या भागात काय करणे आवश्यक आहे हे ठरविण्याचे काम माजी उपमुख्यमंत्री अजित पवार हे स्वतः करीत आहेत.