चौघे साक्षर; सहा जणे जेमतेम पाचवी उत्तीर्ण
म. टा. प्रतिनिधी, पुणे
यंदाच्या विधानसभेत ५५ टक्के आमदार पदवीधर आणि उच्चशिक्षित असून, सहा लोकप्रतिनिधींकडे 'डॉक्टरेट'ची पदवी आहे. मात्र, ४१ टक्के आमदारांची शैक्षणिक पात्रता पाचवी ते बारावीदरम्यान असून, चार जण साक्षर, तर सहा जण जेमतेम पाचवी उत्तीर्ण आहेत.
'महाराष्ट्र इलेक्शन वॉच' आणि 'असोसिएशन फॉर डेमोक्रॅटिक रिफॉर्म' (एडीआर) या संस्थांनी नुकत्याच झालेल्या विधानसभा निवडणुकीतील विजयी २८८ पैकी २८५ आमदारांच्या स्वयंघोषित प्रतिज्ञापत्राचे विश्लेषण करून अहवाल सादर केला आहे. या अहवालात आमदारांच्या शिक्षणाचे प्रगतिपुस्तक मांडण्यात आले आहे. त्यानुसार, नवनिर्वाचित २८८ आमदारांपैकी ११७ आमदारांची शैक्षणिक पात्रता पाचवी ते बारावीदरम्यान असून, १५७ आमदारांनी त्यांची शैक्षणिक पात्रता पदवी आणि त्यापेक्षा जास्त असल्याचे नमूद केले आहे.
...
आमदारांचे शैक्षणिक प्रगतिपुस्तक
साक्षर : ४
पाचवी पास : ६
आठवी पास : १३
दहावी पास : ४४
बारावी पास : ५४
पदवीधर : ७२
व्यावसायिक पदवीधर : ४४
पदव्युत्तर पदवी : ३५
डॉक्टरेट : ६
अन्य : ७
....
नव्या, जुन्यांचा यंदाही संगम
नव्या विधानसभेत ६७ टक्के आमदार मध्यमवयीन असून, त्यांचे वय ४१ ते ६०च्या दरम्यान आहे. पन्नाशी ते साठीदरम्यानचे १०१ आमदार निवडून आले आहेत. १५ टक्के आमदारांचे वय २५ ते ४० वर्षांदरम्यान आहे. ५१ आमदार ६१ ते ८० या वयोगटातील आहेत. त्यामुळे विधानसभेच्या बाकांवरून तरुण आणि ज्येष्ठ आमदार राज्याचे शकट हाकताना दिसणार आहेत.
...
वयोगट आमदारांची संख्या
२५-३० ६
३१-४० ३६
४१-५० ९१
५१-६० १०१
६१-७० ४८
७१-८० ३
एकूण २८५
....
यंदा २४ महिला आमदार
नव्या विधानसभेत २४ महिला आमदारांचा बुलंद आवाज घुमणार आहे. मावळत्या विधानसभेत महिला आमदारांची संख्या २० (सात टक्के) होती. या विधानसभेत हा टक्का वाढला असून, महिला आमदारांची संख्या २४वर पोहोचली आहे.