अभिनेता सुबोध भावे यांचा युवकांना सल्ला
म. टा. प्रतिनिधी, पुणे
'प्रत्येकच आजी-आजोबांसाठी त्यांची नातवंडे म्हणजे दुधावरची सायच असते. आपल्या नातवंडांची स्वप्ने पूर्ण व्हावीत म्हणून आजी-आजोबा नेहमीच प्रयत्नशील असतात. मग नातवंडांनीदेखील आपल्या आजी-आजोबांची स्वप्न पूर्ण करायला नकोत का? आपल्याला त्यांनी जसे सुख दिले, मनमुराद आनंद दिला, तसेच आपणही आपल्या आजी-आजोबांची स्वप्न पूर्ण करण्याचा निश्चय करू या. त्यांनाही त्यांना हवा तसा आनंद घेऊ देण्याचा प्रयत्न आपण करू या,' अशा शब्दांत अभिनेता सुबोध भावे याने युवकांना त्यांच्या आजी-आजोबांची स्वप्न पूर्ण करण्याचा सल्ला दिला.
'महाराष्ट्र टाइम्स कल्चर क्लब' आयोजित 'मीट अँड ग्रीट' कार्यक्रमात 'पुष्पक विमान' या आपल्या आगामी चित्रपटाच्या निमित्ताने सुबोध निवारा वृद्धाश्रमाच्या सभागृहात मंगळवारी तेथील आजी-आजोबांना भेटायला आला होता. या वेळी त्याच्यासोबत सिनेमातील सहकलाकार ज्येष्ठ अभिनेते मोहन जोशी, नवोदित अभिनेत्री गौरी किरण, दिग्दर्शक वैभव चिंचाळकर, मंगेश कुलकर्णी यांनीही उपस्थितांशी संवाद साधला. 'निवारा'तील वृद्धांसोबत इतरही श्रोते या वेळी उपस्थित होते. आपल्या लाडक्या कलाकारांशी उपस्थितांनी मनसोक्त संवाद साधला.
सुबोध म्हणाला, 'असे म्हणतात, की आजोबा नातवाचे पहिले मित्र असतात आणि नातू हा आजोबांचा शेवटचा मित्र असतो. काही वर्षांपूर्वी माझे आजोबा गेले; पण त्यांच्या आठवणी आजही माझ्या मनात तेवढ्याच ताज्या आहेत. आजोबांनी मला अपार प्रेम दिले. त्यांच्या जाण्याने माझ्या आयुष्यात मोठी पोकळी निर्माण झाली. आजी-आजोबा आणि नातवंडांच्या गोड आणि नि:स्वार्थी नात्याचा अनुभव प्रेक्षकांपर्यंत पोचावा, असा माझा प्रयत्न आहे.'
जोशी म्हणाले, 'कोणत्याही घरात आजी-आजोबा ही लहान मुलांचे हट्ट पुरविण्याची हक्काची जागा असते. आज मी स्वतःच्या आयुष्यात हा अनुभव घेतोच आहे. माझे नातूसुद्धा माझ्याकडे हट्ट करतात. त्यामुळे, चित्रपटात अनेक ठिकाणी मी माझी भूमिका प्रत्यक्ष जगत असल्याचेच मी म्हणेन.'
चिंचाळकर म्हणाले, 'मला स्वतःला आजी-आजोबांचे सुख कधी मिळू शकले नाही. त्यामुळेच या हळव्या आणि गोड नात्यावरील चित्रपट करावा, असा विचार माझ्या मनात आला.' गौरी म्हणाली, 'या सिनेमातून मला माझे आजोबाच भेटले, असे मी म्हणेन. ही हळव्या नात्यांची हळवी गोष्ट आहे.'
.
आजोबा नातवाचे पहिले मित्र असतात आणि नातू आजोबांचा शेवटचा मित्र असतो. आजी-आजोबा आणि नातवंडांच्या गोड, नि:स्वार्थी नात्याचा अनुभव प्रेक्षकांपर्यंत पोचावा, असा माझा प्रयत्न आहे.
- सुबोध भावे, अभिनेता
.
महाराष्ट्र टाइम्स कल्चर क्लब' आयोजित 'मीट अँड ग्रीट' कार्यक्रमात 'पुष्पक विमान' चित्रपटातील कलाकार सुबोध भावे, मोहन जोशी, गौरी किरण, दिग्दर्शक वैभव चिंचाळकर, मंगेश कुलकर्णी यांनी उपस्थितांशी संवाद साधला.