म. टा. प्रतिनिधी, पुणे 'महाराष्ट्रीय कलोपासक'तर्फे २७ आणि २८ डिसेंबर रोजी भरत नाट्य मंदिरामध्ये पुरुषोत्तम करंडक स्पर्धेची महाअंतिम फेरी रंगणार आहे. पुण्याबरोबरच जळगाव, नागपूर, अमरावती, रत्नागिरी आणि कोल्हापूर या केंद्रातील विजेत्या एकांकिका नाट्यप्रेमींना पाहता येणार आहेत. महाअंतिम फेरीत १८ संघांचे सादरीकरण होणार आहे. २९ डिसेंबर रोजी सायंकाळी ५ वाजता ज्येष्ठ नाटककार चं. प्र. देशपांडे यांच्या हस्ते पारितोषिक वितरण होणार आहे,' अशी माहिती संस्थेचे अध्यक्ष अनंत निघोजकर यांनी सोमवारी पत्रकार परिषदेत दिली. विश्वस्त मंगेश शिंदे या वेळी उपस्थित होते. महाअंतिम फेरीसाठी श्याम जोशी, प्रा. प्रवीण भोळे आणि शुभांगी दामले परीक्षक असतील. कोल्हापूर केंद्रात 'मोठा पाऊस आला आणि...' ही एकांकिका पहिली असून 'भोंडला' ही एकांकिका प्रायोगिक विभागात उत्कृष्ट ठरली. नागपूर केंद्रातून कमिन्स कॉलेज ऑफ इंजिनीअरिंगची 'दिव्यदान' ही स्वप्नील गोहटे लिखित एकांकिका प्रथम आली. अमरावतीच्या श्री शिवाजी सायन्स कॉलेजच्या विद्यार्थ्यांची 'खाप' ही एकांकिका प्रायोगिक विभागात सर्वोकृष्ट ठरली आहे. औरंगाबादच्या अभियांत्रिकी महाविद्यालयाने सादर केलेली 'मॅट्रिक' ही एकांकिका जळगाव केंद्रातून प्रथम आली आहे. दापोलीच्या कृषी महाविद्यालयाची 'एचटूएसओफोर' ही एकांकिका रत्नागिरी केंद्रात प्रायोगिक गटात सर्वोकृष्ट ठरली आहे. एस. पी. हेगशेट्टे महाविद्यालयाची 'फर्स्ट डे सेलिब्रेश' ही एकांकिका रत्नागिरी केंद्रात प्रथम
आली आहे. पुणे केंद्रातून अहमदनगरच्या न्यू आर्ट, कॉमर्स अॅन्ड सायन्स कॉलेजच्या 'लाली' या एकांकिकेने प्रथम क्रमांक पटकाविला आहे.