बालभारती-पौड फाटा रस्त्याला अखेर मुहूर्त

विकास आराखड्यात बदल नसल्याने रस्ता मंजूर

म. टा. प्रतिनिधी, पुणे

शहराचा विकास आराखडा मंजूर झाल्याने गेल्या अनेक वर्षांपासून प्रलंबित असलेल्या बालभारती ते पौड फाटा दरम्यानच्या रस्त्याच्या कामातील अडथळे दूर होण्याची चिन्हे आहेत. कोथरूड आणि सेनापती बापट रस्ता जोडणाऱ्या या शंभर फुटी रस्त्यामुळे कर्वे रोडसह लॉ कॉलेज रोडवरील ताण हलका होण्यास मदत होणार आहे.
कोथरूड आणि परिसरात होणारी वाहतूक कोंडी सोडविण्याच्या दृष्टीने बालभारती ते पौड फाटा दरम्यान रस्त्याची संकल्पना मांडण्यात आली होती. या रस्त्याचे एका बाजूचे काम महापालिकेने सुरू केले होते. या रस्त्यामुळे पर्यावरणाचे नुकसान होणार असल्याचा दावा करून पर्यावरणवाद्यांनी मुंबई हायकोर्टात याचिका दाखल केली होती. त्यावेळी, कोर्टाने हा कलम २०५ खाली आखलेला रस्ता रद्द केला होता. महापालिकेच्या विकास आराखड्यामध्ये (डीपी) रस्त्याची आणखी पुन्हा दर्शविण्यात आली. तसेच, त्यावर हरकती-सूचना मागवून सुनावणीही पूर्ण करण्यात आली. त्यामुळे, या डीपी रस्त्यांमध्ये त्याचा समावेश झाला होता.
राज्य सरकारने महापालिकेच्या ताब्यातून डीपी काढून घेतल्यानंतर नेमलेल्या त्रिसदस्यीय समितीनेही बालभारती ते पौड फाटा दरम्यानचा हा रस्ता कायम ठेवला होता. सरकारने नुकताच डीपी मान्य केला असून, त्यात रुंदी कमी-जास्त केलेल्या काही रस्त्यांवर पुन्हा सुनावणी घेण्यात येणार आहे. त्या व्यतिरिक्तचे डीपीतील सर्व रस्ते मंजूर झाले असल्याचे स्पष्ट करण्यात आले आहे. बालभारती-पौड फाटा रस्त्याची रुंदी ३० मीटर (शंभर फूट) असून, रुंदीमध्ये कोणताही बदल दर्शवण्यात आलेला नाही. त्यामुळे, हा रस्ता मंजूर झाला असल्याने त्याचे रखडलेले काम पुन्हा मार्गी लागण्याची चिन्हे आहेत. रस्त्यासाठी आवश्यक असलेल्या जागेची भूसंपादन प्रक्रिया पालिकेतर्फे लवकरच सुरू केली जाईल, असे संकेत पालिकेच्या वरिष्ठ अधिकाऱ्यांनी दिले.

दोन्ही बोगद्यांनाही मान्यता
शहरातील वाहतूक कोंडी सोडवण्यासाठी डीपीमध्ये दर्शविण्यात आलेल्या दोन बोगद्यांपैकी नरवीर तानाजी मालुसरे रस्ता (सिंहगड रोड) ते तळजाई दरम्यानच्या रस्त्याच्या रुंदीत वाढ केली गेली आहे. हा रस्ता २४ मीटरपर्यंत वाढविण्यात आल्याने त्यावर पुन्हा हरकती-सूचना मागविण्यात येणार आहेत. तर, पाषाण लगतच्या पंचवटी येथील प्रस्तावित बोगद्यातील रस्त्याच्या रुंदीत बदल करण्यात आलेला नाही. त्यामुळे, हा रस्ताही मंजूर झाला आहे.