म. टा. प्रतिनिधी, पुणे
केंद्रीय वस्तू व सेवा कर अर्थात जीएसटी विभागातर्फे 'स्टेकहोल्डर्स फीडबॅक' दिवसानिमित्त विविध ठिकाणी कार्यक्रमांचे आयोजन करण्यात आले होते. यामध्ये व्यापारी व कर सल्लागारांना नव्या जीएसटी रिटर्न्सबाबत मार्गदर्शन करण्यात आले; तसेच त्यांचे अभिप्रायही जाणून घेण्यात आले.
'जीएसटी रिटर्न्स'चे सुलभीकरण आणि हे रिटर्न्स अधिक करदात्यांना अनुकूल बनविण्यासाठी केंद्र सरकारने एक एप्रिल २०२० पासून नवीन जीएसटी रिटर्न्स सुरू करण्याचा प्रस्ताव ठेवला आहे. या परताव्यांची चाचणी आवृत्ती 'जीएसटी पोर्टल'वर उपलब्ध करून देण्यात आली आहे. एएनएक्स-१ आणि एएनएक्स-२ रिटर्न्सची चाचणी आवृत्ती पाहावी आणि त्यावर अभिप्राय द्यावा, अशी विनंती सरकारने सर्व भागधारकांना केली आहे. या पार्श्वभूमीवर पुणे आयुक्तालयातर्फे विविध ठिकाणी हा कार्यक्रम आयोजिण्यात आला होता.
पुणे कस्टम आणि 'सीजीएसटी झोन'तर्फे संस्थेने पुणे, कोल्हापूर, सातारा, सांगली, सोलापूर, बारामती आणि गोवा येथे हा कार्यक्रम आयोजिण्यात आला होता. या विभागात सुमारे दोन लाख करदाते येतात. या कार्यक्रमात विविध व्यापारी व उद्योजक संघटना, मंडळ आणि कर सल्लागार संघटनांनी भाग घेतला. सुमारे दोन हजार व्यक्तींनी या कार्यक्रमाचा लाभ घेतला. भागधारकांना नवीन रिटर्न्सविषयी सादरीकरण; तसेच नवीन जीएसटी रिटर्न भरणे व अपलोड करण्याबाबत प्रशिक्षण देण्यात आले. उपस्थित सदस्यांना 'एआयओ टर्मिनल'ही प्रदान करण्यात आले. व्यापाऱ्यांना रिटर्न्स भरण्यास मदत करण्यासाठी सीजीएसटी अधिकाऱ्यांची नेमणूक करण्यात आली आहे. काही भागधारकांनी ट्रायल रिटर्न्स दाखल करून अपलोड केले आणि त्यावर अभिप्राय नोंदवला.