म. टा. प्रतिनिधी, पुणे
महाराष्ट्र साहित्य परिषदेचे माजी प्रमुख कार्यवाह, मसाप पत्रिकेचे माजी संपादक आणि विशाखा दिवाळी अंकाचे संपादक ह. ल. निपुणगे (वय ८३) यांचे रविवारी निधन झाले. त्यांच्यामागे पत्नी लेखिका शीला निपुणगे, दोन मुली, जावई आणि नातवंडे असा परिवार आहे. निपुणगे गेल्या पन्नास वर्षांहून अधिक काळ साहित्य विश्वात कार्यरत होते.
पुष्पक प्रकाशनाच्या माध्यमातून त्यांनी अनेक साहित्यिकांची पुस्तके वाचकांसमोर आणली. ज्येष्ठ साहित्यिक ह. मो. मराठे यांची अनेक पुस्तके पुष्पक प्रकाशनातर्फे प्रकाशित करण्यात आली होती. या शिवाय 'विशाखा' या दिवाळी अंकाद्वारे निपुणगे साहित्य विश्वात परिचित झाले. नुकत्याच झालेल्या दिवाळीमध्ये त्यांनी संपादित केलेला अंक शेवटचा अंक ठरला. ज्ञानपीठ पुरस्कार विजेते ज्येष्ठ साहित्यिक भालचंद्र नेमाडे, साहित्य संमेलनाध्यक्ष, साहित्य अकादमी पुरस्कार प्राप्त लेखक, यांच्यावर निपुणगे यांनी काढलेले 'विशाखा'चे विशेषांक गाजले. प्रदीर्घ वर्षांच्या साहित्यप्रवासातील आठवणींना उजाळा देणारे त्यांचे 'हलचल' हे आत्मचरित्र प्रसिद्ध आहे.